Kryeministri Edi Rama duket se kishte përgatitur strategjinë për të larguar me ligj kryebashkiakët e tij, që kishin 3 apo më shumë mandate.
Në këtë mënyrë duket se Rama kishte ngritur strategjinë për të shpëtuar nga të paktën dy kryebashkiakë, Vangjush Dakon dhe Qazim Sejdinin, të akuzuar jo vetëm nga opozita, por të kapur edhe përgjime të agjensive të huaja ligjzbatuese, me grupe kriminale.
Nëse sot KQZ do të kishte miratuar propozimin e PS-së për të ndaluar kandidimin e kryebashkiakëve me 3 apo më shumë mandate, Rama në cilësinë e kreut të kësaj partie, do të ishte tërësisht i shfajësuar dhe plotësisht i justifikuar për moskandidimin e tyre.
Tashmë, Rama është përballë Dakos dhe Sejdinit, dhe ndonjë kryebashkiaku tjetër, ndoshta jo me kaq shumë peshë, pa u kushtëzuar nga ligji për t’i kandiduar.
Në këto kushte Kryeministri duhet të vendosë nëse do të rikandidojë Dakon e kapur në përgjime, apo Sejdnin e akuzuar publikisht për lidhjet e tij. Nëse për Sejdinin mund të gjendet një zgjidhje për të mos e kandiduar për shkak edhe të dëshirës së tij, kjo gjë nuk mund të thuhet për Dakon, e angazhuar edhe në 2017 për të mbledhur votat në funksion të fitores së tepsisë nga Rama.
Të paktën, ndaj dy kryebashkiakëve që cilësohen si “krahu” i fortë i Ramës, në javët në vijim do të shihet nëse ka vullnetin ose jo për t’i mbrojtur nga problemet ligjore.
