Këshilli i Lartë i Prokurorisë i ka kthyer një përgjigje zyrtare Partisë Demokratike dhe Lëvizjes Socialiste për Integrim lidhur më kërkesën e tyre për shkarkimin e Arta Markut nga pozicioni i Prokurores së Përgjithshme.
Kreu i KLP-së, Gent Ibrahimi, në këtë sqarim drejtuar PD-LSI, shkruan se e drejta për nisjen procedimit disiplinor i takon Inspektoratit të Lartë të Drejtësisë.
“Nuk është në kopentencat tona, argumentimin do ta bëjë me një shkresë që do t’ia drejtoj opozitës”, u shpreh Kreu i KLP, Gent Ibrahimi pak ditë më parë.
“E drejta për nisjen e procedimit disiplinor ndaj Prokurorit të Përgjithshëm i takon Inspektorit të Lartë të Drejtësisë dhe se deri në përfundim të mandatit të Kolegjit të Apelimit procedimet disiplinore kundër Prokurorit të Përgjithshëm shqyrtohen nga Kolegji i Apelimit dhe jo KLP”, thuhet në letër.
Partia Demokratike dhe LSI kërkuan rreth 1 muaj më parë shkarkimin e Kryeprokurores marku, pas skandalit të publikuar se një nga anëtarët e KLP, Bujar Shehi, ka qenë pjesë e strukturave të sigurimit të shtetit.
Sipas PD-LSI, “Arta Marku është e ngarkuar me detyrë nga ligji që të verifikojë integritetin e figurës për të gjithë ata që kandidojnë për Këshillin e Lartë të Prokurorisë, por në rastin e Bujar Sheshit nuk e ka përmbushur këtë detyrim ligjor”.
