Nga Boldnews.al
Punonjësit e Policisë Private, në pronësi të deputetëve socialistë apo të familjarëve të tyre, po sfidojnë ndjeshëm së fundmi rolin e Policisë së Shtetit, duke ndërhyrë dhunshëm në rastet kur i prishet “terezia” pushtetit.
“Boldnews.al” ka raportuar të Premten mbi dhunën që punonjës të “Ndreu Security” ushtruan ndaj pacientëve dhe familjarëve të tyre, për shkak se këta të fundit protestuan për mungesën e mjekëve në Urgjencën e Qendrës Spitalore Universitare “Nënë Tereza”, në Tiranë.
Në pamjet ekskluzive, të raportuar nga “BN”, dallohej qartë se si punonjësit e Security, duke marrë rolin e policisë, ndërhynë dhunshën dhe goditën qytetarët, të cilët presin dhe meritojnë një shërbim, të paktën minimal, në Shërbimin e Urgjencës.
Kompania “Ndreu Security” është në pronësi të vëllait të deputetit të Partisë Socialiste, Pjerin Ndreu. Madje, punonjësit e kësaj kompanie dhe të tjerë njerëz janë të bindur se deputetit është “pronari” në hije i kësaj kompanie.
Mesa duket, arroganca që karakterizon maxhorancën socialiste, është përcjellë edhe tek kompania private “Ndreu Security”. Punonjësit e keqpaguar të kompanisë private të Sigurimit, siç duket marrin frymën e forcës nga pronarët e tyre të vërtetë.
Duket se nuk kanë aspak frikë që veprimet e tyre janë në kundërshtim me ligjin dhe mund të përballen me ligjin. Por, fakti që punonjësit e “Ndreu Security” marrin përsipër që të dhunojnë qytetarët në halle shëndetësore, duket se ata kanë garanci se nuk do t’i prekë askush nga institucionet ligjzbatuese.
Sjellja e “Ndreu Security” në Urgjencën e Spitalit “Nënë Tereza” është thuajse e ngjashme me ndërhyrjen e dhunshme të punonjësve të një tjetër kompanie, të drejtuar nga eksponenti i lartë socialist, Safet Gjici, kundër studentëve protestues.
Pak javë më parë, “të fortët” e “Eurogjicit” goditën dhe dhunuan studentët, të cilët kishin zgjedhur si formë proteste bllokimin e auditorëve. Pamjet shokuese u shpërndanë në media dhe u pa qartë, me zë e figurë, që policët privatë morën përsipër një detyrë që as Policia e Shtetit nuk do të guxonte ta kryente-dhunimin e studentëve paqësorë.
Por, me Safet Gjicin në krah, punonjësit e “Eurgjicit” duket se nuk kanë asnjë frikë përballë ligjit, të cilin e shkelën me të dyja këmbët.
Maxhoranca socialiste, tashmë pas Policisë së Shtetit, duket se ka në krahun e saj edhe formacionet, gati “paramilitare” të kompanive private, ‘Ndreu” dhe ‘Eurogjici”, të cilat vihen në lëvizje sa herë që shtresa vulnerabël të shoqërisë ngrenë zërin e protestës.
