Nga Boldnews.al
Strategjia e kryeministrit është qartësuar këto ditë… Kushdo që tenton ta djegë politikisht, është i destinuar të digjet bashkë me të, përfshi edhe qytetarët. Rreziku që po ndodh dhe pak e shohin nga kakofonia politike, po shtrihet edhe në radhët e qytetarëve.
Kryeministri po selekton si të mirë dhe “qytetarë të denjë” ata të cilët e duartrokasin dhe e mbështesin. Pjesën tjetër që proteston e konsideron si antishtet, si e keqja e madhe që po pengon vendin të integrohet në BE.
Nuk dihet nëse e ka në gen, apo është krijesë emergjente e mendjes kryeministrore format e antimitingjeve. Kjo nuk kishte ndodhur në Shqipëri që nga viti 1990. Të ashtëquajtuarit idhtarët e Enverit, pas çdo tubimi që mbante Partia Demokratike e sapokrijuar, ngriheshin në turma të mëdha dhe bënin një kundramiting. Ky ishte ai moment që njerëzit mund të shkonin në konflikt civil. Këto skena, janë rikthyer 29 vjet më pas…
Ndërsa shumë qytetarë ndodhen në rrugë e protestojnë kundër qeverisë, armata e pushtetit organizon takime me kryeministrin. Në vetëm dhjetë ditë Rama ka nisur me vetëdije turin “bashkia që duam”, duke vizituar tre qytete. Mijëra qytetarë, punonjës të administratës apo edhe përkrahës të zellshëm të kryeministrit, përbëjnë dekorin absurd ku ai flet dhe ata duartrokasin apo lëshojnë ovacione dhe kjo gëzon pa masë Ramën. Kjo është ajo Shqipëri virtuale dhe mediatike që ai dëshiron.
Pjesa tjetër që proteston në rrugë, që është në opozitë me pushtetin është e “keqja” sipas tij. Dy Shqipëri, njëra që proteston dhe tjetra që e mbështet, shihet ndryshe nga Rama. Edhe pse deri tani nuk ka mundur ta shtrijë konfliktin poshtë në popull, ndarja që po bën ka rrezikun e madh nga pas.
Këto metoda ndjekin diktatorët, por rreziku është pikërisht ndasitë që i bën qytetarëve. Rama nuk po merret më me opozitarët pa mandate deputetësh dhe imunitet. Rreziku për të përbën ajo pjesë qytetare që proteston dhe sa më shumë Rama i etiketon si “pengesë për zhvillim” apo kriminelë që dhunojnë institucionet frustrimi është edhe më i madh.
