Dy persona humbën jetën si pasojë e një atentati të ndodhur në zonën e Ujit të Ftohtë në Vlorë, ndërsa një tjetër është plagosur dhe është transportuar drejt spitalit rajonal.
Viktimat janë identifikuar si Aurest Rexho dhe Arjan Hasani, ndërsa i plagosuri Armando Sulejmani ndodhet në spital jashtë rrezikut për jetën.
Sulejmani, 41 vjec, i cili ndodhet jashtë rrezikut për jetën, raportohet se edhe më parë i ka shpëtuar një atentati. Në atë kohë ngjarja ka ndodhur në maj të 2016, në lagjen “Pavarësia” të Vlorës ku ai mbeti i plagosur me një plumb në krah.
Sulejmani njihet ndryshe me nofkën “Çipuri”, ish-anëtar i një prej bandave kriminale që ka vepruar në Vlorë përgjatë 1997.
Policia në atë kohë raportonte se Sulejmani dhe atentatorët e tij kishin pasur përplasje me armë.
Në atentatin e ndodhur sot viktima kanë mbetur kunati dhe miku i “Çipurit”.
Sulejmani mësohet se ka qenë i dënuar për vrasje. Ai ishte i dënuar me 20 vite burg për vrasje, ndërsa e ka fituar lirinë rreth 3 vite më parë.
Gjithashtu ai ka qenë i dyshuar për atentatin ndaj Ferdinand Llanajt, i cili mbeti i plagosur në muajin tetor të vitit 2017.
Në një informacion paraprak për ngjarjen, policia tha se “një grup i posaçëm hetimor u ngrit menjëherë dhe po punon për sqarimin e rrethanave dhe identifikimin e ndalimin e personave të implikuar në ngjarje. Për shkak të hetimeve nuk mund të bëhen të ditura detaje të tjera”.
Në janar të këtij viti në një tjetër atentat në Vlorë mbeti i plagosur Mikel Mehmeti nga Selenica e Vlorës, njohur si anëtar i bandës së Llanajve. Llanajt njihen për masakrën e Çolës, ku pas një sherri në kazino në prill të vitit 2015, u vranë 3 të rinj. Një nga autorët e masakrës është Aleksandër Llanaj, që po vuan dënimin në burg.
Sikundër raportohet, Çipuri ka qenë i dyshuar edhe për një atentat të dyfishtë në nëntor të 2018-ës në qytetin e Durrësit.
