Nga Boldnews.al
Efektivi i Policisë së Malësisë së Madhe Berhan Bajrakurti mund të fitojë lirinë, tre ditë pasi u arrestua në vijim të publikimit në rrjete sociale të një videoje, ku ai i tregon organet gjenitale nëpërmjet telefonit një personi të paidentifikuar, me gjasë një të miture 15-vjeçare.
Mesditën e së Hënës, portali “Newsbomb” i pari e më tej mediat e tjera on-line dhe ato klasike publkuan video-regjistrimin e kryer nga vetë polici.
Publikimi i videos shoqërohej me informacionin se ajo ështe marrë nga telefoni i një 15-vjeçareje, nënës së të cilës i ishte refuzuar marrja e kallëzimit për këtë rast “ngacmimi seksual” nga posta policore e Malësisë së Madhe e më tej nga Komisariati i Shkodrës. Madje, sipas të njëjtit informacion, nëna e vajzës së mitur është kërcënuar që të mos dorëzojë kallëzim penal për efektivin Bajrakurtaj.
Menjëherë pas publikimit të videos, policia arrestoi efektivin e saj, Bajrakurtaj, si i dyshuar për “ngacmim seksual” ndaj një të miture.
Por, prej tre ditësh, Policia e Shkodrës deklaron se nuk ka gjetur ende denoncuese. Mungesën e denoncueses e deklaroi i pari Ministri i Brendshëm, Sandër Lleshaj, i cili mbërriti në Malësinë e Madhe një ditë pas publikimit të ngjarjes.
Pa një denoncues konkret, formalisht policia nuk mund të konstatojë nëse videoja e regjistruar nga Bajrakurti i është drejtuar një të miture apo jo.
Nëse ky element nuk provohet, atëherë edhe arrestimi i tij, në aspektin procedurial, më së paku është i nxituar.
Në bazë të Kodit të Procedurës Penale, policia duhet të dorëzojë brenda 48 orëve provat paraprake ndaj personit që arreston me iniciativën e saj.
Prokuroria nga ana e saj ka 48 orë të tjera afat për të vleresuar provat e para dhe për të përcaktuar nëse do të kërkojë masë sigurimi në gjykatë apo do të kërkojë lirimin e menjëhershëm.
Në rastin e efektivit Bajrakurtaj, deri më tani rezulton se mungon prova thelbësore- e mitura. Gjithashtu, sipas burimeve policore nga Shkodra, ekspertët nuk kanë arritur të përcaktojnë se cilit numër apo adresë në rrjete sociale i është dërguar videoja “perverse” e Berhan Bajrakurtaj.
Në mungesë të këtyre provave, polici i arrestuar tre ditë më parë mund të lirohet, duke ngritur pikëpyetje-kjo histori ishte një “fake news” apo denoncuesja gjendet nën kërcënim dhe nuk guxon t’i afrohet zyrave të Policisë??
