Kreu demokrat Lulzim Basha, gjatë turit në jug të vendit, ka zhvilluar një vizitë në kampin e internimit në Tepelenë. Basha u njoh me kushtet e tmerrshme nga i mbijeturai i kampit të Tepelenës, Simon Miraka.
Miraka ka treguar detaje nga një prej kampeneve famëkeqe të internimit në kohën e diktaturës. Miraka shkoi në këtë kamp në moshën 4 vjeç dhe ka qëndruar 5 vjet atje.
Ai rrëfen se në këtë kamp shumë fëmijë kanë vdekur në kampin e Tepelenës për shkak të kushteve të vështira, mungesës së ushqimit dhe higjenës.
“Këtu ka qënë një çezmë, dy fëmijë që ishin pak më të shkathët, më të mëdhenj, mosha 8-9 vjeç, nga uria kalojnë telat. Kalojnë telat dhe shkojnë të mbledhin ca kokrra të kuqe. Janë ca ferra që lëshojnë kokrra të kuqe.
Hanë aty shpejt e shpejt dhe mbushin dhe xhepat. Kur u futën brenda, i pa polici dhe shkoi i kapi të dy. Të betohem, nuk ka asnjë ekzagjerim, i ka mbajtur lidhur gjithë natën në shtyllë. 8-9 vjeç.
Çezma, ngaqë frynte, iu binte stërkalat e ujit dhe ata qanin. Mirëpo prindërit, e ëma – nëna ime më kishte në krahë, vëllai ishte pak më i madh – brenda telave. Këta ishin jashtë telave dhe i kishin lidhur. I dëgjonin që qanin dhe ulërinin dhe u thoshin “mos qani, ja ku jemi këtu…” dhe në mëngjes i kanë zgjidhur. Të dyve u kishte rënë të fikët”, rrëfeu Mirakaj.
