Nga Klodian Tomorri
Qeveria po përgatit një tjetër koncesion, i cili ja kalon kontrollin e pompave në stacionet e karburanteve një kompanie private. Sot ky shërbim është shtetëror dhe kryhet nga drejtoria e metrologjisë.
Është një biznes 3-4 milionë euro ne vit, i cili sigurisht paguhet nga qytetaret. Kompanitë e naftës paguajnë drejtorisë së metrologjisë 14 mijë lekë të reja për çdo pistoletë që kanë në stacionet e karburanteve dhe ketë kosto e ngarkojnë në çmimin e naftës.
Por tani paratë nuk do i shkojnë me shtetit, por privatit që do fitojë koncesionin. Minimalisht janë 60 milionë euro për 20 vitet e koncesionit, gjithmonë nëse privati do të mbajë të njëjtat tarifa që paguhen sot në shtet.
Praktikisht koncesioni i pompave është një transferim i pastër i taksave të qytetareve nga buxheti i shtetit në llogari private. Nëse dy koncesionet e mëparshme, të çilet prekin naftën, ai i markimit dhe skanimi u dhëne tek privati për shërbime që nuk kryheshin fare nga shteti, ky i pompave është unik. Këtu jepet një sherbim, i cili kryhet aktualisht nga shteti dhe për të cilin nuk ka asnjë ankese nga askush.
Qeveria e ka ndarë mendjen që t’ja kaloje privatit paratë e buxhetit, për arsyet qe i di ajo. Ç’është është pse hesht opozita?
Zoti Basha ka marrë angazhim publik se do të anulojë taksën e qarkullimit, e cila në fund fare shkon në buxhetin e shtetit dhe financon shkolla, spitale, rrogat e administratës. Por opozita nuk po thotë asgjë për një tarifë që sot shkon në shtet, por nesër do privatizohet. Dhe i gjithë investimi që do bëjë privati për të privatizuar 60 milionë euro është vetëm 500 mijë euro.
Çfarë e detyron një opozitë të heshte kur buxheti i shtetit devijohet në llogari private përmes koncesioneve të dyshimta dhe procedurave të kontestuara. Apo… ??
