Të hënën, ekipi i Skënderbeut do të përballet me Laçin në javën e 21-të të Kategorisë Superiore dhe fitorja është detyrim për të dalë nga kriza që ndodhet prej më shumë se dy muajsh.
Përpara seancës së djeshme stërvitore, trajneri Orges Shehi ua ka bërë të qartë lojtarëve se ndaj Laçit luhet vetëm për fitore, duke u munduar të punojë më tepër edhe nga ana psikologjike në këtë moment të vështirë.
“Gjashtë humbje radhazi janë të patolerueshme për ambientin e klubit tonë, aq më tepër që vijmë pas një sezoni fantastik. Çdo ekip e kalon një moment të keq, por duhet t’i japim fund kësaj pritjeje për t’u rikthyer në rrugën e duhur. Për këtë arsye, ndaj Laçit duhet të luajmë me objektivin e vetëm: fitoren. Asnjë rezultat tjetër nuk është më i tolerueshëm për ne. E di që këtë periudhë fati dhe mungesat na kanë penalizuar, por ka ardhur koha të mos krijojmë më alibi, por të përgjigjemi në fushë me rezultate.”, mësohet të ketë thënë dje para ekipit trajneri Shehi.
