Gjatë debatit në Kuvend, në një seancë që u karakterizua nga akuza dhe kundër-akuza mes mazhorancës dhe opozitës, ish-kryeministri Sali Berisha është ndalur në atë që e quajti skema e vjedhjes së 4 milionë eurove nga familja Rama brenda 24 orëve me energjinë elektrike.
Sipas Berishës, boshti i kësaj vjedheje qëndron te i preferuari i zonjës së Kryeministrit, Linda Ramës, emëruar në krye të OSHEE-së.
“Kjo mazhorancë qëndron mbi vjedhjen dhe korrupsionin.
Vetëm dhjetë ditët e fundit, brenda 24 orëve, klani i Edvin Kristaq Ramës vodhi në KESH, 4 milionë euro në 24 orë!
Siç thotë Komisariati i Energjisë në Vjenë, njerëz të afërt të kryehajdutit të vendit, blenë në kompaninë shqiptare, blenë energji. Tek kush? Tek akrabaja i familjes Rama, i emëruari dhe i preferuari i zonjës Basha: Ardian Çela.
Në fakt e blenë energjinë tek KESH-i dhe ia shitën Ardian Çelës. E blene 34 euro kilovatin dhe ua bleu, Ardian Çela, hajdutëve të Edi Ramës dhe për Edi Ramën, me 49 euro kilovatin.
Në 24 orë, nga ujërat e këtij vendi, nga digat e këtij vendi, nga sistemi i transmetimit, sistemi i shpërndarjes, kompanitë e lidhura me kryeministrin, vodhën 4 milionë euro. Kjo është vjedhja e fundit”, tha Berisha.
