Nga Boldnews.al
Prokuroria e Tiranës ka nisur prej disa ditësh hetimin për nxjerrje të “sekretit hetimor” pas publikimit të disa përgjimeve nga dosja “339”, në të cilën rezultojnë komunikime të zyrtarëve të lartë të Partisë Socialiste dhe qeverisë së Edi Ramës me eksponentë të krimit të organizuar në Durrës dhe Lezhë.
Në listën e personave nën hetim, sipas një njoftimi zyrtar të Prokurorisë, gjenden emrat e të gjithë personave që kanë pasur kontakt me aktet e përgjimit. Nën hetim janë prokurorë që kanë qenë ose janë pjesë e veprimeve të kryera në dosjen “339”, si edhe oficerë të Policisë Gjyqësore që i janë atashuar kësaj dosjeje dhe ata që kanë kryer përgjimet në bërthamën kontrolluese, e cila gjendet në Prokurorinë e Përgjithshme.
Por, burime për “Boldnews.al” nga Prokuroria e Tiranës konfirmojnë se në listën e personave nën hetim që dyshohet se kanë publikuar përgjimet është edhe emri i drejtueses së Prokurorisë për Krime të Rënda, Donika Prela.
Emri i saj gjendet bashkë me vartësit e saj prokurorë, të cilët kanë pasur në duar dosjen “339”. Por, përfshirja e emrit të saj në listën e personave nën hetim ngre një pikëpyetje tjetër, e cila shoqërohet me dyshime për veprime anti-ligjore të shefes së Krimeve të Rënda.
Donika Prela nuk ka qenë asnjëherë prokurore e dosjes “339”. Në bazë të ndryshimeve kushtetuese dhe ligjore, pjesë e paketës së Reformës në Drejtësi, prokurori i çështjes është ai që ka detajet e dosjes hetimore dhe elementët e saj, përfshirë edhe përgjimet, janë ekskluzivitet vetëm i tiji.
Në rastin konkret, Donika Prela rezulton se ka qenë në kontakt me elementët e dosjes “339”, përkatësisht përgjimet, përsa kohë që emri i saj gjendet në listën e personave të dyshuar për nxjerrjen e sekretit hetimor.
Reforma në Drejtësi, ndër të tjera, përcaktoi pavarësinë e plotë të prokurorit gjatë hetimeve. Në ligjin “Për prokurorinë” përcaktohet se “..drejtuesi i Prokurorisë kërkon informacion për ecurinë e procedimeve dhe, nëse është e nevojshme, nxjerr udhëzime me shkrim, sipas këtij ligji..”.
Pra, ligji i jep mundësinë drejtuesit të Prokurorisë që të marrë informacion të përgjithshëm mbi ecurinë e hetimeve, por jo të njihet me elementë të veçantë të tij, aq më tepër të përgjimeve.
Në rastin konkret, Donika Prela, në cilësinë e drejtues së Prokurorisë për Krime të Rënda, rezulton se ka avancuar, duke shkelur në këtë mënyrë frymën e Kushtetutës dhe legjislacionin penal dhe procedurial penal.
DENONCO