Ish-drejtori i Arkivit në Ministrinë e Brendshme, Kastriot Dervishi, ka deklaruar se ndër kandidatët e SPAK, ka ish-hetues të komunizmit.
“U njoha me kandidatët që do jenë pjesë e Prokurorisë Speciale Antikorrupsion (SPAK). Gjeta hetues të komunizmit aty. Dihet që janë ustallarë të dënimeve politike, sepse në formim janë komunistë, profesionalisht të varfër dhe udhëhiqen nga shpirtvogëlsia e lufta e klasave”, shprehet përmes një statusi në Facebook historiani Devrishi, njohës i mirë i dosjeve të Sigurimit të Shtetit.
Dervishi hedh akuza edhe ndaj Komisionit të Pavarur të Kualifikimit, se kalon kandidatët pa hetuar lidhur me të shkuarën e tyre në kohën e komunizimit.
“Deri sa të vdesin do jenë kandidatë këta? Pse duhet t’i besoj këtij kallëpi të dëmshëm se do na sillka drejtësi? I kalon KPK-ja pa i parë asnjë proces të tyre të kohës së komunizmit”, e mbyll postimin e tij Dervishi.
Pak ditë më parë, Autoriteti i Dosjeve pranoi ekzistencën e dokumenteve që dëshmojnë se anëtari i KLP-së Bujar Sheshi, ka bashkëpunuar me Sigurimin e Shtetit.
Nëse denoncimi i Devrishit rezulton i vërtetë, kjo përbën një skandal më vete të drejtësisë së re. /Boldnews.al/
Gara për SPAK/ Aplikojnë edhe tre prokurorë të tjerë (EMRAT)
