Klubi i Skënderbeu ka denoncuar një rast dhune në stadiumin “Redi Maloku” të Fushë Krujës, ku pritet të startojë në orën 14:00 sfida mes Kastriotit dhe skuadrës korçare.
Në faqen zyrtare në Facebook, klubi korçar ka njoftuar se është ushtruar dhunë ndaj 3 prej lojtarëve të Skënderbeut, nga persona të paautorizuar, që kishin hyrë në ambientet e stadiumit.
Pre e dhunës kanë rënë Oto John, Kristi Vangjeli dhe Idriz Toskiç, me këtë të fundit që grumbullohet për herë të parë me skuadrën korçare, ndërsa klubi korçar denoncon edhe mungesën e forcave të rendit në ambientet e stadiumit.
Dhuna ndaj korçarëve raportohet se është ushtruar në momentin që këta të fundit po zbrisnin nga autobusi, për t’u futur në stadium.
Taka: Po mendojmë bojkotimin e ndeshjes
Gjithashtu se drejtuesit e klubit korçar kanë kërkuar që ndeshja të mos luhet sot, pasi nuk janë kushtet ideale për të luajtur këtë sfidë. Vetëm para pak minutash korçarët janë futur në dhomën e zhveshjes, por nuk dihet ende vendimi i marrë.
Presidenti Adrian Takaj në një reagim lidhur me ngjarjen, tha se “është e papranueshme që shkohet për të luajtur ndeshje në vitin 2019 dhe nuk as polici të shtetit dhe as polici private në stadium”.
“Mbi 20 persona kanë sulmuar lojtarët tanë dhe në këtë moment po mendojmë të bojkotojmë ndeshjen. Është e tmerrshme që nuk ka siguri fare. Nuk e di nëse do të luajmë apo jo, kaq mund të them për momentin”, deklaroi për “Panorama Sport” presidenti Takaj.
/Boldnews.al/