Erdhi vera dhe bashkë me të nis dhe sezoni i dasmave. Pavarësisht dasmave rrëzëllitëse të VIP-ave që shohim në rrjetet sociale ne mund të realizojmë një dasmë po aq të bukur me kosto të ulët financiare.
Nëse keni vendosur të mos merrni një planifikues dasmash, atëherë duhet të bëni një listë prioritetesh.
– Ftesat. Ftoni vetëm njerëzit më të rëndësishëm. Ka ikur koha kur në dasma ftohen edhe njerëz të cilët as nuk e dije që ishin pjesë e fisit.
– Fustani. Dihet që veshjet e dasmës janë të shtrenjta, por mund të hidhni një sy edhe nga koleksionet e vitit të shkuar. Ka fustane që janë të bukur në çdo kohë dhe moda nuk i ikën kurrë.
– Unazat. Floriri kushton. Një zgjidhje simbolike do të ishte përdorimi i unazave të vjetra të familjes, që trashëgohen brez pas brezi. Perëndimorët e kanë traditë këtë. Një zgjidhje tjetër, mund të jetë krijimi i një unaze të personalizuar nga varëse, vëthë apo bizhuteri të tjera që nuk i përdorni prej vitesh.
– Lulet. Për të kursyer, buqetat dhe dekorimin e ambientit mund ta bëni vetëm me lule të stinës.
– Fotografi dhe muzika. Për këto detyra të rëndësishme, zgjidhni më të talentuarit e fisit. Mjafton që aparati fotografik të jetë profesional dhe listën muzikore ta zgjidhni ju.
– Salla. Për ta gjetur me një çmim të arsyeshëm, mos e rezervoni në sezonin e dasmave por bëheni rezervimin me kohë. Kështu do të keni më shumë shanse të përfitoni në çmim.
Këto ishin disa sugjerime që mund t’i merrni në konsideratë, por nuk duhet të hiqni dorë asnjëherë nga detajet që kanë rëndësi dhe janë të pazëvendësueshme për ju.
