Dy ditë më parë u sekuestrua në Portin e Durrësit një sasi prej 53.1 ton mish e importuar nga Brazili. Kjo sasi madhe mishi u bllokua nga Autoriteti Kombëtar i Ushqimit pasi rezultoi me salmonelë. Mishi transportohej në 4 konteinerë të nisur nga Brazili dhe kishte destinacion tregun e brendshëm shqiptar.
Pas analizave të kryera nga AKU në portin e Durrësit ai rezultoi i infektuar me salmonelë dhe shumë i rrezikshëm për shëndetin e konsumatorit. Pas këtyre veprimeve, nga AKU u tha se ngarkesa do të kthehej në vendin e origjinës. Por ende nuk dihet se çfarë u bë me këtë sasi mishi pasi nuk ka një njoftim zyrtar që është rikthyer në Brazil apo është asgjësuar në vendin tonë.
Çfarë tha për mishin me salmonelë zv.ministrja e Bujqësisë Mira Gjeci?
Zv/ministrja e Bujqësisë Mira Gjeci duke iu referuar edhe skandalit të importit të mishit me salmonelë nga Brazili deklaroi se qeveria shqiptare po kryen vetë analiza për çdo sasi mishi që futet në vend pa u shpërndarë në treg.
Sipas saj kërkesa për të inspektuar këtë produkt mishi kishte vetë nga autoritetet braziliane. “Vetë ky shtet është i ndërgjegjshëm që ka probleme në zinxhirin e prodhimit të mishit, e se një pjesë e tij mund të jetë i kontaminuar, prandaj u kërkon këtë procedurë vendeve pritëse. Kjo kërkohet nga Brazili që sasia e mishit të kontrollohet nga vendet ku do të shkojë”, u shpreh Gjeci.
Kush lobon në vendin tonë që të importohet mish nga Brazili?
Importi i mishit nga Brazili ka rinisur në vendin tonë. Importi u bllokua në mars të vitit 2017 për shkak se mishi rezultoi me salmonelë dhe i kalbur në disa ngarkesa të importuara. Por importi i këtij produkti nga Brazili u lejua sërish më 11 shtator të 2017, 6 muaj pas bllokimit.
Kreu i Qendrës së Eksporteve Shqiptare, Alban Zusi ishte i pari i cili dha lajmin në shtator të vitit të kalur se importi i mishit nga Brazili është lejuar përsëri. Për lejimin e importit të mishit nga Brazili AFI (Albanian Food Industri) dha arsyen se “qeveria braziliane ka korrigjuar vendimin për eksportet e produkteve shtazore drejt Shqipërisë”. Nga Zusi u tha më tej se pas kësaj qeveria e këtij vendi përmes një memorandumi reflektoi korigjimet e duhura. Kështu iu hap edhe njëherë rrugë importit nga Brazili.
Në mars të këtij viti autoritet tona nxorrën një udhëzim sipas të cilit produktet me bazë mishi nga Brazili nuk do kalojnë në territorin shqiptar, pa iu bërë më parë analizat. Me këtë justifikim u lejua që në shtatorit të 2017 të importohej sërish mish nga Brazili edhe pse disa herë kishte rezultuar me sëmundje.
Por kush është lobuesi?
Duhet të themi që Alban Zusi (ai që dha lajmin i pari) në vitin 2015 ka mbajtur postin e zv/ministrit të Bujqësisë me LSI-në, ndërsa aktualisht ai po punon ngushtë me ministrin Niko Peleshi. Po kështu ai është një nga sipërmarrësit më të mëdhenj në vend të industrisë agro-ushqimore.
Është shumë aktiv në shoqatat e importuesve të mishit duke qenë drejtues në këto shoqata.
Bizneset e tij janë pjesë e AFI (Albanian Food Industri). Ai njihet si nga njerëzit kyç që merret me tregtimin e mishit në vendin tonë.
Gjithashtu njihet si një person shumë i afërt me ministrin e Bujqësisë Niko Peleshin. Ai ka kërkuar nëpërmjet Shoqatës së tij që siguria ushqimore në vend jepej me koncesion. Zoti Alban Zusi u investua në një studim që parashikonte dhënien me koncension të sigurisë ushqimore, studimi u realizua në bashkëpunim me Fondacionin Soros. /Hashtag.al
