Ministrat e Jashtëm të G7 janë bashkuar për të dënuar Rusinë për sjelljen e bërë, për të cilën thanë që ka dëmtuar ligjin ndërkombëtar.
Ministrat gjithashtu i bënë thirrje Moskës për të ndihmuar në zgjidhjen e konfliktit në Siri dhe të gjithë ranë dakord të krijonin një grup pune për të studiuar “sjelljen e keqe” të Rusisë.
Sekretari i Jashtëm britanik Boris Johnson tha se kishte shqetësime rreth veprimeve të Moskës në Ukrainë dhe Siri.
Komentet e Johnson për gazetarët, gjatë takimit dy-ditor të ministrave të G7 në Toronto, theksuan se tensionet mes Moskës dhe Perëndimit janë rritur vazhdimisht gjatë viteve të fundit.
Agjencitë amerikane të inteligjencës kanë thënë se Rusia ka ndërhyrë në fushatën e zgjedhjeve presidenciale të vitit 2016-të dhe Rusia gjithashtu është fajësuar për sulmin me agjent nervor ndaj një ish-spiuni rus në Britani muajin e kaluar.
Johnson tha se ministrat e G7 kishin rënë dakord mbi nevojën për të qenë vigjilentë me Rusinë, e cila mohon përfshirjen në zgjedhjet e SHBA-së dhe çdo përfshirje në sulmin në Britani.
Sfida për G7 është se ajo gjithashtu ka nevojë për ndihmën e Moskës për të zgjidhur krizën në Siri, ku Rusia dhe Irani mbështesin presidentin sirian Bashar al-Assad.
