Të gjithë qytetarët që realizojnë të ardhura vjetore mbi 2 milionë lekë kanë më pak se një javë kohë për të bërë deklarimin e tyre. Ligji përcakton 30 prillin si afatin e fundit që ata duhet të plotësojnë deklaratën e të ardhurave.
Nga të dhënat e Drejtorisë së Përgjithshme të Tatimeve rezulton se deri më tani kanë dorëzuar deklaratën e të ardhurave 7425 persona. Nga këta, vetëm 497 persona rezultojnë të punësuar diku tjetër dhe marrin pagën e konsideruar e lartë. Pjesa tjetër janë të vetëpunësuar. Numri i “të pasurve” që kanë deklaruar të ardhurat vjetore të tyre është rritur me 464 persona në harkun kohor të një viti.
Këtu mund të përfshihen edhe persona të rinj që kanë përfituar këtë pagë, por edhe ata që më përpara nuk e kanë deklaruar dhe tani po formalizohen.
Cfarë duhet të deklarojnë individët?
Drejtoria e Përgjithshme e Tatimeve shpjegon se cfarë deklarimesh duhet të bëjnë individët që e plotësojnë kriterin ligjor të të ardhurave mbi 2 milionë lekë në vit në deklaratën e tyre.
“Janë të ardhura të tatueshme të ardhurat nga pagat dhe shpërblimet, të ardhurat nga dividenti, të ardhurat nga lojerat e fatit, të ardhurat nga fitimet kapitale, nga shitja e pasurisë së paluajtshme apo pronësisë që ka në aksione apo kapitale në shoqëri. Të ardhurat nga qiratë, nga interesat bankare”, shprehet Alketa Çabej, përfaqësuese e Drejtorisë Ligjore në Drejtorinë e Përgjithshme të Tatimeve.
Ajo shpjegon se në rast se plotësimi i deklaratës bëhet gabim ose individi do të korrigjojë, të dhënat kanë afat tre mujor. “Nëse ata e vërejnë që gjatë deklarimit nuk i kanë llogaritur të ardhurat e përfituara, a kanë harruar ndonjë gjë nga të ardhurat që kanë përfituar gjatë vitit, atëherë ata mund ta ndryshojnë pa asnjë penalitet”, shprehet Çabej.
Ligji parashikon që nga shuma e të ardhurave qytetarëve iu zbriten shpenzimet e bëra për interesat bankare për shkollim, si dhe shpenzimet për mjekim.
“Kanë të drejtën që të zbresin shpenzime dhe këto shpenzime janë për interesa bankare për shkollim, për vete për fëmijët apo personat nën kujdestari, si dhe shpenzimet për mjekim për atë pjesë të atyre pjesë të shpenzimeve, që nuk mbulohen nga skema e sigurimeve të detyrueshme”, deklaron Çabej.
Edhe për zbritjen e shpenzimeve, individët duhet të deklarojnë dhe të vërtetojnë pretendimet e tyre me fatura, njësoj si në ratsin e të ardhurave./ekonomix/
DEKLARIMET PËR TË ARDHURAT MBI 2 MLN/ LEKË/VIT
(Burimi: Drejtoria e Përgjithshme e Tatimeve)
Viti 2017 7.425 individë
-Me pagesë 497 individë
Viti 2016 6.961 individë
-Me pagesë 567 individë
Rritja vjetore 464 individë
