Nga Boldnews.al
Kryebashkiaku i Tiranës, Erion Veliaj është tërhequr nga dhënia e lejes së ndërtimit së një kompleksi pallatesh në Fushën Sportive të Laprakës.
Pas reagimit të banorëve të zonës, si edhe denoncimit publik nga disa media, përfshirë edhe “Boldnews.al”, Veliaj nuk ka pranuar aplikimin e kompanisë “Salillari shpk” për të shndërruar këndin më të njohur sportiv të Laprakës në beton.
“Boldnews.al” ka qenë ndër të paktat hapësira mediatikë që i kanë dhënë zë fuqishëm shqetësimit të banorëve të Laprakës. Prej disa kohësh, një grupi qytetarësh u bashkuan në rrjete sociale për të denoncuar rastin. Nga hulumtimi mediatik, rezultoi se trualli ku sot gjendet Fusha e Sportit në Laprakë, u është njohur si pronësi disa familjave, në vitin 2014.
Tre vjet pasi trashëgimtarët morën pronën, ata nënshkruan një kontratë sipërmarrje me firmën “Salillari shpk”. Ky i fundit, në bazë të kësaj kontrate, do të shkatërronte të gjithë hapësirën ku është fusha dhe do të ndërtonte një kompleks me 5-6 pallate. Për të realizuar qëllimin e tij, Salillari kishte marrë, në parim, edhe “OK” e kryebashkiakut të Tiranës, Erion Veliaj.
Në Dhjetor 2017, Salillari kryen veprimet e nevojshme kontraktore me pronarët, të cilët më pas aplikuar për bllokimin e pronës në Hipotekë, në favor të projektit me beton të Salillarit.
Por, siç, reagimi publik, për më tepër vetëm një vit para zgjedhjeve lokale, duket se e ka detyruar “Lali Erin” që të mos nënshkruajë lejen e ndërtimit në favor të Salillarit. Ai, me këtë “tërheqje”, duket se ka bërë edhe llogaritë politike për përballjen me elektoratin në zgjedhjet e ardhshme lokale, në vitin 2019.
Erion Veliaj, me këtë lëvizje synon që të mbledhë vota në zonën e Laprakës, e cila në përgjithësi konsiderohet si një bastion i djathtë në Tiranë. “Boldnews.al” ka raportuar më parë edhe për “ftohjen” që Veliaj ka me kryetarin e Partisë Socialiste, Edi Rama. Ndaj, më shumë se çdo herë, Erion Veliajt nuk i intereson që të shtojë më shumë dozat e pakënaqësisë së qytetarëve të Tiranës, të cilët, gjithësesi kanë shumë rezerva për punën e tij.
Gjithësesi, tërheqja nga firmosja e lejes së ndërtimit për kompleksin e banimit tek Fusha Sportive e Laprakës, shënon një fitore të vogël, por të merituar të banorëve, të cilët u bashkuan për të denoncuar një rast abuzimi të pastër me detyrën.
