Ishte janari i vitit 2017 kur 30-vjeçarja Drilona Duriçi u dogj e gjallë në ashensorin e pallatit ku jetonte. Nga hetimet rezultoi se vatra e zjarrit u shkaktua nga djegia e droselit të ndriçimit, çka ka sjellë edhe djegien e tavanit të ashensorit. Kjo lidhje e shkurtër shkaktoi flakë në të gjithë rrjetin elektrik që ndriçon kabinën e ashensorit dhe elektromotorit mbi kabinë.
Frika se një ngjarje e tillë mund të ndodh në çdo moment rritet, pasi të enjten ashensori i një pallati në zonën e “Myslym Shyrit” në Tiranë është përfshirë nga flakët.
Nga hetimet paraprake ashensori ka ndaluar në katin e parë të pallatit, ndërsa dyshohet se shkak i zjarrit kanë qenë kabllot elektrike.
Fatmirësisht në momentin që ashensori është përfshirë nga flaktë nuk ka pasur njerëz brenda tij.
Pavarësisht se Bashkia e Tiranës po fut administratorë në çdo pallat, duket se problemet nuk kanë të mbaruar. Fakt është godinat e banimit të ndërtuara pas viteve ’90 kanë ashensorë të pasigurt, pasi shumë prej tyre nuk janë të standardeve europiane “CE”.
Ky produkt që lidhet me sigurinë e jetës së qytetarëve, prej vitesh kontrollohet nga teknikë të çfarëdoshëm. Nuk ekziston ende asnjë strukturë shtetërore që i kontrollon këto produkte, si dhe mbikëqyr funksionimin e tyre.
Ekspertët thonë se pas inspektimit të kryer në zona të tilla si “Komuna e Parisit”, Laprakë, “Astiri” dhe “Fresku”, ashensorët rezultojnë jashtë standardeve të BE-së. Të shumta janë rastet kur banorët thonë se kanë mbetur brenda për orë të tëra, ndërsa është dashur ndërhyrja e forcave zjarrfikëse.
Në vitin 2011 është miratuar ligji 10.487, “Për tregtimin dhe mbikëqyrjen e tregut të produkteve joushqimore”, i cili në nenin 9 të tij e përcakton markimin “CE” si kriter, që do të thotë se çdo ashensor duhet ta ketë.
