Kreu demokrat Lulzim Basha nuk ka pranuar të shpalosë strategjinë e opozitës në lidhje me protestat. Gjithsesi Basha tha se nuk do të ketë një protestë të vetme, por një valë protestash, ndërsa shtoi se mos prisni që një gjë të tillë ta bëjë publike sot.
“Ne kemi ftuar qytetarët të na bashkohen, që do të thotë se do të kemi një valë protestash. Kemi organizuar protesta madhështore, por të jeni të bindur se e keqja nuk ikën as me këto protesta. E keqja do të ikë kur populli ti thotë Edi Ramës ik, dhe ai është i ikur. Sfida jonë nuk është vetëm protesta, por ti tregojmë shqiptarëve programin tonë, rikthimin te qeverisja”, tha Basha.
Sipas tij, PD po kërkon krijimin e një aleance vlerash, një aleance të energjive poztive. “Për të krijuar një aleancë të tillë duhet të tejkalosh shumë gjëra, duhet të jesh i hapur për kritikët, duhet të identifikosh njerëzit mbi bazë merite, dhe këto janë një sfidë e madhe”, tha Basha.
