Një sasi e konsiderueshme eksplozivi, e aktivizuar në distancë, hodhi në erë makinën e një biznesmeni inertesh në Tiranë.
Ngjarja ndodhi në orën 09:45, në afërsi të Liqenit të Thatë, kur mjeti në pronësi të biznesmenit 42-vjeçar, Ndok Rajta, një “Volkswagen”, me targa AA 946 EF, kishte vetëm 3 minuta që ishte parkuar.
Shpërthimi i fuqishëm ka shkatërruar tërësisht makinën, duke dëmtuar edhe xhamat e disa objekteve përreth, por fatmirësisht nuk ka pasur persona të lënduar. Shërbimet e Policisë kanë shkuar menjëherë në vendin e ngjarjes, duke rrethuar një zonë me diametër rreth 70 metra, pasi pjesët e makinës ishin shpërndarë në disa drejtime.
Veç forcave të Policisë, në vendngjarje shkuan edhe ekspertë të Xhenios, që bënë këqyrjen e automjetit të shkatërruar thuajse tërësisht. Burimet thanë se nga veprimet e para hetimore dyshohet se në makinë ka qenë e vendosur një sasi prej rreth 200-300 gramësh. Ndërsa aktivizimi i lëndës plasëse, që mendohet të ketë qenë tritol, është bërë nga distanca, me telekomandë.
Burime nga Policia thanë se, nisur nga këto rrethana, dyshohet se autorët kanë ndjekur nga afër lëvizjet e biznesmenit Rajta. Të njëjtat burime thanë se autorët nuk kamë pasur si qëllim vrasjen e Ndok Rajtës, pasi shpërthimi ka ndodhur 3 minuta pasi ai ka zbritur nga makina. Ngjarja, sipas Policisë, dyshohet se mund të jetë një paralajmërim për biznesmenin.
HETIMI
Biznesmeni nga Dibra, Ndok Rajta, i cili kishte një aktivitet në fushën e materialeve inerte pranë vendit ku ndodhi ngjarja, ka deklaruar para oficerëve të Policisë se nuk ka probleme me njeri. Burime nga grupi hetimor thanë se Rajta nuk i ka orientuar te ndonjë person konkret tek i cili mund të ketë dyshime. Megjithatë, deri tani janë ngritur dy pista nga ana e Policisë. E para ka të bëjë me ndonjë konflikt të mundshëm për çështje konkurrence në biznes, të cilën edhe vetë 42- vjeçari nga Dibra nuk e ka mohuar.
Ndërsa pista e dytë është ajo e ndonjë konflikti personal që ai mund të ketë pasur në të kaluarën. Burimet thanë se, pavarësisht se biznesmeni ka mohuar të ketë pasur probleme, është verifikuar një konflikt i hershëm që ai ka pasur me disa persona nga Dibra, edhe pse ende nuk dihen me saktësi motivet e këtij konflikti. Një tjetër version që po hetohet nga Policia, nisur nga deklarimet e biznesmenit, është dyshimi se objektivi mund të mos ketë qenë vetë Rajta.
Kjo për shkak se, sipas tij, automjeti që u hodh në erë nuk përdorej vetëm nga ai, por edhe nga punonjësit e kompanisë që administron. Pra, sipas biznesmenit, automjeti ku ishte vendosur eksplozivi nuk është makina e tij personale, por e shoqërisë dhe përdoret edhe nga persona të tjerë.
