Kryeministri Edi Rama, duke iu referuar parashikimeve të motit, tha se zonën verilindore të vendit priten reshje bore dhe paralajmëroi kontraktorët të hedhin kripë në rrugë për të shmangur problemet me qarkullimin.
“Është e rëndësishme të mbahet parasysh se sipas parashikimeve do ketë reshje bore në zonën verilindore të vendit. Dhe për këtë dua ta përsëris megjithëse e qartësuam më parë me ministrin e Infrastrukturës që kontraktorët duhet të garantojnë që të hidhet kripa në akset rrugore që mund të preken nga dëbora ashtu si parashihet në kontratë dhe të mos shkojmë mbas dëborës po të kemi një masë të thjeshtë parandaluese për pasigurinë që shoqëron pastaj rënien e dëborës në kushtet kur s’ka asnjë masë të kësaj natyre”, tha Rama në mbledhjes e pasdites së Komitetit të Koordinimit dhe Menaxhimit të Emergjencave Civile.
“Po ashtu është e domosdoshme që në të gjitha aspektet këto kontrata të reja të mbështetura në standarde të reja të monitorohen, sepse këto janë momente të provës së zjarrit për kontratat dhe për kontraktorët që janë të angazhuar”, shtoi kreu i qeverisë.
‘Të nisë identifikimi i dëmeve’
Kryeministri kërkoi nisjen e procesit të identifikimit të dëmeve, me prioritet banesat, familjet në nevojë, shkollat dhe urat.
“Identifikimi dhe inventarizimi i dëmëve dhe pasojave, duke renditur banesat të parat, pastaj rrugët, urat, shkollat që janë prekur dhe ku duhet ndërhyrë menjëherë për të bërë të mundur që mësimi të nisë sa më parë”, u shpreh shefi i Qeverisë.
Rama kërkoi transparencë dhe seriozitet në përgatitjen e faturave të zhdëmtimeve.
“Fatura e zhdëmtimeve dhe kompensimeve duhet përgatitur me transparencën dhe seriozitetin më të madh, që askush nga njerëzit e prekur dhe familjet në nevojë të mos mbetet jashtë listës. Planet për rivendosjen e situatës normale të infrastrukturës duhen përgatitur me shpejtësi”, vijoi ai.
