Faza e parë e stuhisë te mazhoranca duket se ka kaluar. Por tashmë një tjetër problem po shfaqet në sfond. “Bomba” e radhës është lëshuar nga Greqia, ku hedhin akuza se karteli i drogës është nën urdhrat e Tahirit. Media greke “Zougla”, në një artikull kushtuar kartelit të drogës që u zbulua pas operacionit ku u sekuestrua një gomone me 1.6 ton lëndë narkotike, e cila ishte nisur nga Himara, shkruan se në pranga ka rënë edhe një biznesmen grek. Kjo media shkruan ndër të tjera se karteli i drogës bëhej nën urdhërat e ish-ministrit të Brendshëm, Saimir Tahiri, si dhe njerëzve pranë kryeministrit Rama.
Sasia e drogës është zbuluar nga shërbimet amerikane, ndërkohë që në operacion morën pjesë shërbimet greke dhe ato italiane. “Të gjitha këto shërbime arritën në përfundimin se karteli funksiononte nën urdhërat apo tolerancën e ish-ministrit Tahiri”, thuhet në artikull.
Mediat fqinje flasin për mafie shqiptare të mirëorganizuar. “Kathimerini” thotë se ky grup kriminal qëndron pas rasteve të trafikut të drogës në prill dhe shtator 2017 nga Shqipëria në Itali.
Po sipas këtyre burimeve, marijuana i përket bandës së Habilajve dhe një prej shqiptarëve të arrestuar është i afërm i Saimir Tahirit. “Sipas të dhënave paraprake, trafiku i 1.6 ton kanabis nga Shqipëria në Turqi ishte planifikuar të bëhej më herët, por u pezullua për shkak të zhvillimeve në Shqipëri. Anëtarët e rrjetit kriminal thuhet se u alarmuan nga arrestimet që bëri Guarda di Finanza në tetor. Ndër të arrestuarit ishte edhe një afërm i ish-ministrit të Brendshëm të Shqipërisë”, shkruan gazeta greke.
Pasi ndjek më vëmendje të gjithë këtë operacion, pyetja e parë që të vjen ndërmend ka të bëjë me afatin kohor. Pse kaq vonë? Mos vallë ka një përpjekje për ta ulur edhe më shumë “statusin” ose imazhin e Tahirit, tani që ai është i “dobët”? Duket se Tahiri mori një “njollë”, por çfarë përgjegjësie ka në këtë çështje?
Nuk do shumë mend për ta kuptuar se kjo akuzë e rëndon edhe më shumë, pas dosjes Habilaj, ku është përfshirë në hetim. Emri i ish-ministrit të Brendshëm, ka dalë nga përgjimet ambientale të Policisë Italiane, e cila ka vënë në pranga rrjetin e bandës së Habilajve nga Vlora.
Në dokumentin prej rreth 400 faqesh të Prokurorisë së Catanias, janë publikuar mesazhe të personave të arrestuar dhe përgjimet ambientale, të cilat janë bërë kryesisht kur kanë qenë në makinat e tyre. Emri i Tahirit ka dalë në përgjimin ambiental të 16.12.2013, në makinën e Moisi Habilajt dhe ortakut të tij, Sabaudin Çelaj, i njohur me nofkën “Sabi”. Në këtë përgjim theksohet se Tahiri bën në muaj rreth 5 milionë euro fitim nga paratë që merr nga organizata e tyre.
