Lulzim Basha mungoi sot në pritjen që Presidenti Ilir Meta mbajti në Pallatin e Brigadave me rastin e festave të Nëntorit. Ai vendosi të vizitojë Shkodrën për të marrë pjesë në koncertin e organizuar me rastin e 105-vjetorit të pavarësisë. Në postimin në Facebook, Basha e quan këtë mbrëmje speciale.
Por a është ky koncert i organizuar në Shkodër arsyeja pse kreu i Partisë Demokratike mungoi në pritjen që organizoi Meta në Tiranë?
Përpos aludimeve se Basha mund t’a ketë zgjedhur Shkodrën si pasojë e këshillave të PR-ve, apo se mbrëmjet festive i kalon gjithnjë mirë atje, një tjetër arsye duket se do t’a shtynte kryedemokratin të mos pozonte krah Metës sot.
Fotoja më poshtë është shkrepur sot paradite. Monika Kryemadhi, aleatja e Bashës në ‘Frontin e bashkuar të krimit të organizuar’, ishte në Elbasan krah kryebashkiakut aq të sulmuar nga Basha dhe PD-ja, Qazim Sejdini.
Sipas PD-së, Qazim Sejdini është përgjegjës për trafik droge, vjedhje votash dhe mbrojtje të kriminelëve. Por, kjo nuk e pengoi Kryemadhin, që në dukje i ka dhënë besën Lulzim Bashës për të luftuar qeverinë e krimit dhe instalacionet e saj në gjithë vendin, të pozojë dhe të festojë ditën e pavarësisë së vendit krah një krimineli të supozuar nga aleati i saj.
Ky veprim i Kryemadhit duket se nuk e ka peguar as vetë Bashën të zgjedhë të pozojë në Shkodër për këtë ditë feste, dhe jo pranë bashkëshortit të aleatës së tij në opozitë, Ilir Metës.
