Mëngjesin e sotëm, në orën 08:30 Kryeministri Edi Rama ka zhvilluar një takim me deputetët socialistë të Komisionit të Ligjeve. Tema e diskutimit mësohet se ka qënë shkarkimi i kreut të KQZ dhe zgjedhja e Prokurorit të ri të Përgjithshëm.
Në 4 Dhjetor, Adriatik Llallës i mbaron mandati në krye të institucionit qendror të akuzës, por ende nuk kanë nisur procedurat për Kryeprokurorin e ri.
Bazuar te Reforma në Drejtësi, Këshilli i Lartë i Prokurorisë ka të drejtën e hapjes së procedurës dhe dërgimit në Kuvend të një liste me kandidatët për Prokuror të Përgjithshëm. Por vonesa e ngritjes së Këshillit të Lartë të Prokurorisë mund të sjellë përplasje mes palëve politike.
Sipas ekspertëve dy janë rrugët që do të ndiqen; ose do të zgjatet mandati i Llallës ose parlamenti do të ndërhyjë përmes një mekanizimi ekstra ligjor për të komanduar një Kryeprokuror deri në krijimin e institucioneve të reja të KLGJ dhe KLP.
