Një shtetas italian po hetohet në gjendje të lirë pasi iu gjetën 350 mijë euro, shumë kjo që iu gjet në pikën e kalimit kufitar të Rinasit, ndërsa po largohej nga Shqipëria.
Policia thotë se janë kryer veprimet hetimore për veprën penale “Mosdeklarim në kufi i të hollave ose sendeve me vlerë”, parashikuar nga neni 179/a të Kodit Penal në ngarkim të shtetasit M.C., 51 vjeç lindur në Tradate, Itali.
Veprimet hetimore në ngarkim të këtij shtetasi u kryen për arsye se gjatë kontrollit të pasagjerëve me itinerar Shqipëri-Itali, ky shtetas u përzgjodh për verifikim në vijën e dytë, ku gjatë kontrollit iu gjetën dhe sekuestruan në cilësinë e provës materiale një sasi prej 350.000 euro, shumë të cilën ky shtetas nuk e kishte deklaruar në zyrën doganore.
Policia ka bërë sekuestrimin e vlerës monetare.
