Ambasadori i Rusisë në Serbi, Alexander Cepurin pretendon se sipas ligjeve ndërkombëtare Kosova është pjesë e Serbisë. Këto deklarime Cepurin i ka bërë në një intervistë për gazetën ruse “Sputnik”.
“Për çështjet e rëndësishme Rusia dhe Serbia kanë interesa të përbashkëta. Sa i përket Kosovës, sipas të gjitha ligjeve dhe rregullave ndërkombëtare, Kosova mbetet pjesë e Serbisë, dhe ne e mbështesim integritetin serb”, tha Cepurin.
Fokusin kryesor në intervistë, ambasadori rus e pati tek deklaratat e zyrtarit të lartë amerikan Hoyt Yee, i cili tha se Serbia nuk duhet të ulet në dy karrige, duke aluduar te BE-ja dhe Rusia.
Cepurin ka thënë se deklaratës së Yee nuk duhet ti kushtohet shumë rëndësi, pasi është e ekzagjeruar.
Ambasadori rus mw tej pretendon se qëndrimi i zëvendës-ndihmës sekretarit amerikan, nuk e përfaqëson qëndrimin zyrtar të shtetit të Amerikës. Cepurin deklaroi se Amerika nuk duhet të sillet sikur të ishte pjesë e Bashkimit Evropian.
“Përshtypja është se Amerika është përfaqësuese e BE-së, por situata nuk është krejt e qartë. SHBA është jashtë Bashkimit Evropian. Ne dhe shumë vende tjera kemi punuar dhe bashkëpunuar për të mirën e BE-së”, deklaroi ambasdaori rus.
