4 anëtare të stafit të Parlamentit Europian kanë akuzuar
institucionin për injorim të denoncimeve për ngacmim seksual. Rrëfimet e 4 grave erdhën gjatë një debati në Parlament lidhur me këtë çështje, ndërkohë që pak ditë më pare, stafi i parlamentit francez ngriti të njëjtat pretendime kundër deputetëve vendas.
Parlamenti Europian është akuzuar se ka fshehur pretendimet për përdhunim. Kështu pretendojnë 4 gra, pjesë e stafit të institucionit, të cilat shtojnë se ankesat e tyre janë injoruar nga mbikëqyrësit e tyre.
Denoncimet e 4 punonjëseve përfshijnë raste të dhunës seksuale si dhe dy raste të përdhunimit nga kolegët. Njëra nga 4 viktimat madje shton se është dekurajuar ta denoncojë incidentin në polici.
Këto rrëfime vijnë teksa europarlamentarët në Strasburg debatuan mbi mënyrat për t’i dhënë fund çdo forme të ngacmimit seksual dhe në një kohë kur rasti i producentit hollivudian Harvey Weinstein vijon të mbetet në qendër të vëmendjes.
Gjatë debatit, disa europarlamentare mbanin në duar pankartat “Edhe unë” për t’u solidarizuar me viktimat dhe për të treguar se ato kishin patur eksperienca negative.
Madje disa europarlamentare kanë shkruar një letër drejtuar presidentit të Parlamentit Europian Antonio Tajani, duke kërkuar hetime për rastet e ngacmimit seksual në institucion, në përgjigje të pretendimeve.
Letra gjithashtu kërkon krijimin e një komiteti të dedikuar për ngacmimet seksuale dhe që viktimave t’u sigurohet mbështetje ligjore dhe mjekësore.
