Nga 1 janari, familjet shqiptare do të paguajnë minimalisht dy herë më shumë taksa për shtëpinë e tyre nga sa paguajnë aktualisht.
Qeveria publikoi paketën e re fiskale, e cila ndryshon rrënjësisht skemën e taksave që familjet paguajnë për pronën.
Sipas formulës së re, taksa kalon nga tarifë fikse mbi sipërfaqen që është aktualisht në taksë sa 0.05 për qind e vlerës së pronës.
“Qeveria Shqiptare në vijim të një periudhe të gjatë analizimi, studimi dhe konsultimi me grupet e interesit, me Fondin Monetar Ndërkombëtar, ka vendosur të ndryshojë mënyrën e taksimit të kategorisë ‘ndërtesa’,” thuhet në relacionin e ligjit. Sipas qeverisë, kjo është një metodë më e drejtë taksimi.
Si ndryshon barra?
Aktualisht taksa e pronës në Tiranë është 30 lekë për metër katrorë. Kjo do të thotë se një familje, e cila zotëron një apartament banimi 100 metër katrorë, paguan gjithsej 3 mijë lekë taksë prone në vit.
Por nga 1 janari, taksa nuk do të jetë më fikse mbi sipërfaqen, por do të jetë mbi vlerën. Nëse i njëjti apartament 100 metër katrorë ka një vlerë tregu 100 mijë euro, atëherë taksa që do të paguhet për të është 50 euro në vit ose 6 mijë e 500 lekë.
Kjo do të thotë se taksa rritet me mbi dy herë nga niveli aktual. Sipas relacionit të qeverisë, në total barra e taksave për familjet shqiptare nga taksa e pronës do të rritet me 2.4 miliardë lekë ose 20 milionë euro në vit.
