Zv/kryetari i Lëvizjes Socialiste për Integrim, Luan Rama, pas mbledhjes së grupit parlamentar, në një konferencë për shtyp paraqiti vendimet e LSI në lidhje me çështjen Tahiri.
Rama tha se LSI është plotësisht në anën e Prokurorisë, për autorizimin e nisjes së hetimeve ndaj ish-ministrit të Brendshëm Saimir Tahiri.
“U diskutua dhe shqyrtua rendi i ditës së Kuvendit që do mblidhet të mërkurën në lidhje me kërkesën e Prokurorisë për autorizimin për të proceduar penalisht Tahirin.
Grupi i LSI rithekson qëndrimin e vet parimor, ligjor dhe në përputhje me moralin politik, por edhe me aspiratën e qytetarëve që presin nga Kuvendi dhe nga të zgjedhurit e popullit qasje që respekton ndarjen e pushteteve, autoritetin kushtetues të drejtësisë. Ne do votojmë pro miratimit të kërkesës së Prokurorisë për hetimin e paanshëm ndaj çështjes për të cilën ka filluar procedimi penal, si dhe zbardhjen e të vërtetës në lidhje me aktivitetin kriminal.
Kjo është arsyeja e sulmeve politike, të ndërmarra ditët e fundit, të ndërmarra kryesisht nga kreu i qeverisë.
Pritet që Kuvendi të mërkurën të vendosë se kush është pro-reformës në drejtësi dhe kush është kundër,” tha Luan Rama.
