Në orën 10:00 ish ministri i Brendshëm, aktualisht deputeti socialist Saimir Tahiri u pa të hynte në Kryesinë e Kuvendit ku pritet të nisë mbledhja e Këshillit të Rregullores dhe Mandateve.
Sot është mbrojtja e Tahirit lidhur me faktet e reja që prokuroria paraqiti gjatë seancës
së djeshme me dyer të mbyllura.
Ndërkohë prokuroria kërkon heqjen e imunitetit dhe hapjen e rrugës për arrestimin e Saimir Tahirit.
Pas një seancë maratonë, dje Këshilli i Rregullores dhe Mandateve nuk arriti të marrë një vendim duke e shtyrë për ditën e sotme ora 10:00.
Dje në një intervistë për Ora News deputetja Vasilika Hysi, njëherësh edhe anëtare e Këshillit të Mandateve paralajmëroi se Partia Socialiste është drejt një vendimi për të rrëzuar kërkesën e Prokurorisë së Krimeve të Rënda për autorizimin e arrestimit të deputetit Saimir Tahiri nëse para Këshillit të Mandateve nuk paraqiten prova bindëse.
Ajo deklaroi se organi i akuzës nuk paraqiti prova të reja as në seancën me dyer të mbyllura.
Ndryshe nga çfarë pretendon mazhoranca, deputeti demokrat Gent Strazimiri po në një intervistë për Ora News deklaroi se në senacën e djeshme me dyer të mbyllura të Këshillit të Mandateve Prokuroria e Krimeve të Rënda paraqiti prova të reja për çështjen Tahiri.
Strazimiri deklaroi se ky ishte shkaku që pas saj avokati i Tahirit kërkoi 3 ditë kohë për mbrojtjen.
Prokuroria deklaron se ka dyshime të arsyeshme që ish ministri i Brendshëm Saimir Tahiri te jete perfshirë në aktivitetin e trafikut të drogës duke i dhënë mbështetje grupit të Habilajve, i cili u godit pak ditë më parë në Itali.
