Kryetari i PD, Lulzim Basha deklaron se kryeministri Edi Rama dhe ish-ministri Saimir Tahiri po bëjnë një marrëveshje, por theksoi se nuk do të lejohet një gjë e tillë.
“Ne e dimë dhe kemi të dhëna se Edi Rama dhe Saimir Tahiri aktualisht po përpunojnë një marrëveshje me njeri-tjetrin. Saimir Tahiri disponon fakte, të dhëna, përgjime, dokumente dhe filmime për përfshirjen direkte të Edi Ramës në marrëdhënie me banda mafioze, me klanet mafioze të Shqipërisë. Ndaj Edi Rama e ka jetike marrëveshjen me Saimir Tahirin, i cili ndonëse i ekspozuar në mënyrë të pashpresë para opinionit publik dhe para ligjit po përpiqet t’ia hedhë me një kosto sado të ulët dhe të dy të shpëtojnë paq dhe të vazhdojnë të menaxhojnë milionat e eurove dhe pushtetin politik. Kjo nuk mund të ndodhë, kjo nuk duhet të ndodhë. Ndaj as arrestimi i Saimir Tahirit, as procedimi i tij penal, as vënia para drejtësisë e peshqve të tjerë të mëdhenj nuk do të ketë sukses për sa kohë peshku më i madh është i ulur në karrigen e kryeministrit”- deklaroi kreu I PD.
