Kryeministri Edi Rama u kujdes që të sqaronte mungesën e tij tek “foto familjare” në Samitin e Kartës së Adriatikut në Podgoricë. Duke përdorur një televizion kombëtar, Rama u justifikua se duhej të kthehej në Tiranë me helikopter, por për shkak të errësirës dhe sigurisë, ai është nisur më herët sesa të mbaronte Samiti më i rëndësishëm për rajonin.
“Helikopterët tanë nuk udhetojnë natën, ndaj e vetmi korridor ajror që delegacioni të nisej ishte ora 16.00. Sipas planit fillestar, në këtë orar duhet të kishin mbaruar të gjitha aktivitetet e samitit, përfshirë dhe fotoja familjare. Por samiti filloi me vonesë e gjithcka u shty, edhe foto familjare.” – thonë burime pranë Kryeministrisë për Top Channel.
Por në fakt ky justifikim tallës jo vetëm që nuk është i besueshëm, por shton madje dyshimet se kryeministri Rama nuk është lejuar që të dalë në “foton familjare”, ku ishin të ftuar liderët e Ballkanit si dhe zv. Presidentin Amerikan Mike Pence.
Argumenti se helikopteri që shoqëronte kryeministrin Rama, nuk qëndron. Kjo për shkak se Shqipëria disponon helikopterë të modelit COUGAR dhe EC 145, të blerë vitet e fundit, e që sigurojnë udhëtimet natën madje dhe me mot të keq. Vetëm një helikopterë i tillë i blerë nga autoritetet shqiptare në 2010, kushtoi mbi 15 milion euro.
Ndërkohë, Podgorica nuk është më tepër se 30 minuta larg kufirit të Shqipërisë, me makinë. Si zgjidhje për të mos munguar në foton e rëndësishme të liderëve të rajonit, kryeministri Rama mund të kishte përdorur edhe makinën e ambasadorit për tu kthyer në Shqipëri.
Gjithashtu, sipas axhendës së kryeministrisë, nuk kishte asnjë arsye që të justifikohej nxitimi i Ramës, pasi në vijim nuk ishte planifikuar asnjë takim më i rëndësishëm sesa ky. E vetmja axhendë e kryeministrit, mund të ishin pushimet verore në plazhin e Dhërmiut.
Ish kryeministri Sali Berisha, nëpërmjet një postimi në facebook, hedh një tjetër opsion të mungesës së Ramës në “foton familjare” në Podgoricë. Sipas tij, Rama nuk është lejuar për shkak se kishte veshur atletet e kuqe dhe për pasojë thyente etikën në foton me liderët e Ballkanit, ku ishte i pranishëm zv. Presidenti i SHBA, Mike Pence.
Nga Boldnews.al
