Ka përfunduar dëshmia e biznesmenit Ylvi Beqja në gjyq, ku ai qëndroi përballë Emiljano Shullazit dhe bandës së tij.
Pasi konfirmoi se i qëndron të gjithë dëshmisë që ka dhënë në prokurori, biznesmeni Ylvi Beqja iu desh të përballet me Shullazin për ato që kanë ndodhur më herët mes të dyve.
Gjatë ballafaqimit të mëparshëm, Shullazi ka përmendur emra të njohur të përfshirë në aferën mes tij dhe biznesmenit të gjobitur, si ministri Beqja, kreu i Hipotekës, numri dy i SHISH etj.
Por kur Shullazi e pyeste biznesmenin, ky i fundit ka preferuar të mos flasë shumë duke u shprehur se nuk dinte gjë ose nuk mbante mend.
Duke parë këtë Shullazi i është drejtuar i revoltuar gjykatës: “Ky na ka akuzuar neve. Po rrimë në burg ne, tani thotë s’më kujtohet, s’më kujtohet. Do na japë ndonjë përgjigje apo jo. Apo ta mbyllim fare atëherë”.
Ndërkohë gjatë seancës, Ylvi Beqja i kërkoi gjykatës ndjekje penale për Emiljano Shullazin për fyerje dhe kërcënime të bëra në seancën e kaluar, kur trupi gjykues nuk ishte në sallë.
