Mediat pranë kryebashkiakut Erion Veliaj, janë hedhur në sulm për të fshehur atë që mund të cilësohet si një nga skandalet e ndërtimit në Tiranë. Bëhet fjalë për një kompleks pallatesh që pritet të ndërtohet tek ish Parku i Autobusëve, duke zhdukur kështu një tjetër lulishte nga harta e kryeqytetit.
I vënë në qendër të akuzave për dhënien e kësaj leje, Veliaj ka përdorur mediat që ka pranë vetes për të larguar përgjegjësinë nga vetja. Kryebashkiaku i Tiranës ka futur në lojë kompaninë ndërtuese “Arlis Shpk”, e cila akuzoi Lulzim Bashën për lejen e dhënë. Në një deklaratë të bërë publike nga mediat e Veliajt, thuhej se lejen e ndërtimit kjo kompani e kishte marrë në 2013, por që ishte rrëzuar më pas nga Basha pasi kunati i këtij të fundit nuk kishte marrë rryshfet.
“Hapësira në fjalë është pronë private e Familjes Nela dhe e një subjekti privat, i cili ka aplikuar per leje ndertimi sipas ligjit në Bashkinë e Tiranës. Leja në fjalë është lëshuar në bazë të Planit të Përgjithshëm Vendor të Tiranës i miratuar në vitin 2013 nga ish kryetari i Bashkisë së Tiranës, Lulzim Basha. Bashkia e asaj kohe na dergoi Kunatin per t’i “falur” nje pjese te konsiderueshme te ndertimit. Ne e refuzuam kete pasi ishte nje “gjobe” per te lejuar dicka qe vete Plani 2013 e lejonte. Kur ne refuzuam gjoben e Kunatit, z. Basha beri nje teater duke e quajtur “lulishte” pronen tone private si hakmarrje qe nuk i falem gjysmen e biznesit.”- thuhej në njoftimin e shpërndarë në mediat e Veliajt.
Por edhe sikur këto akuza të ishin të vërteta, fakti është që ky kompleks po përdor një leje ndërtimi të dhënë nga Kryetari i Bashkisë së Tiranës, Erion Veliaj. Ky është një tjetër mashtrim i Veliajt për të ndërprerë punimet në kryeqytet, ndërsa për abuzimet e tij tenton tia hedh fajin të tjerëve.
Edhe sikur kunati i Bashës, Erjon Isufi të ketë kërkuar rryshfet (akuza të përsëritura ndaj tij), edhe sikur Basha të ketë dhënë lejen, këtë nuk e bën kryedemokratin më të pastër ndaj publikut.
Por kurrësesi, një kryebashkiak si Erion Veliaj nuk duhet të fshihet pas gishtit, por të dalë hapur dhe tu tregojë qytetarëve përse i ka gënjyer për ndërtimet që po bëhen masivisht në Tiranë, pse i ka gënjyer për kullat qindra metra të larta që do të ngrihen në qendër, përse i ka gënjyer për zhdukjen e lulishtes tek Ish Parku i Autobusëve.
Boldnews.al
