Blerja e votës duket se do të jetë problemi themelor edhe i zgjedhjeve parlamentare të 2017, pavarësisht përpjekjeve për minimizimin e këtij fenomeni dhe akuzave të ndërsjella të partive politike.
Policia e Shtetit deklaron se disponon informacion të mjaftueshëm se elementë të caktuar kanë në përdorim dhe kanë shpërndarë aparate me të cilat do të tentohet të fotografojnë votën si dëshmi. Policia ka publikuar foto të aparateve që tashmë u janë shpërndarë disa qytetarëve, për të fotografuar votën për të dëshmuar se për kë kanë votuar.
Policia e Shtetit thekson “se do të jetë shumë e ashpër për ndëshkimin e çdo krimi elektoral dhe ka marrë të gjitha masat për t’ju përgjigjur në kohe çdo eventualiteti. Nën mbikqyrje po mbahen elementë me tendecë blerjen e votës, në procesin e 25 Qershorit”
Policia e Shtetit paralajmëron çdo qytetar që ka rënë pre e tentativës për shit-blerjen e votës të heqë dorë në kohë nga ky aktivitet kriminal, pasi do të perballet me forcën e ligjit.
