Kreu i Partisë Demokratike Lulzim Basha njoftoi takimim me Presidentine SHBA-ve Donald Trump, gjatë një vizite në Shtetet e Bashkuara. Takimi vjen në kulmin e fushatës elektroale për zgjedhjet e 25 qershorit në Shqipëri. Edhe pse u duk se vizita e Bashës në SHBA nuk kishte rezultatet e pritshme, kreu i PD, pasditen e sotme publikoi në profilin e tij një foto me presidentin Trump. “Takim i jashtëzakonshëm me Presidentin Donald Trump! Vizioni dhe kauza e tij janë frymëzim dhe inkurajim kolosal për lëvizjen tonë për një Republikë të qytetarëve, me ekonomi të fortë dhe të nesërme të sigurt për të gjithë shqiptarët”, shkruan Basha.
Sipas postimit në profilin e tij në Facebook, Basha thotë se sapo ka mbyllur një vizitë 2-ditore në Shtetet e Bashkuara të Amerikës. Kreu i PD ishte i ftuar në Javën e Shtëpisë së Bardhë për Zhvillimin e Fuqisë Punëtore ku po diskutohen iniciativat e administratës Trump mbi uljen e taksave, trajnimin profesional, stazhet e punës dhe financimin e studimeve. “Mirënjohje të pakufishme Presidentit Trump dhe SHBA për mbështetjen për Shqipërinë dhe shqiptarët!”, shkruan Basha.
Takimi i Bashës me presidentin Trump vjen pas një bisede që kryeministri Edi Rama pretendon se ka bërë me presidentin e SHBA-ve gjatë takimit të përfaqësuevse të vendeve anëtare në NATO. Në një emision televiziv Rama tha se kishte patyr dy biseda me presidentin e SHBA-ve, ku pasi i ishte prezantuar, Trump kishte thënë: Ah ah Shqipëria!
