Gjykata e Vlorës ka pezulluar nga detyra drejtorin e Albpetrolit, EndriPuka. Vendimi është marrë në datën 2 qershor 2017 dhe firmosur nga gjyqtari Albert Spiro, pas një kërkese të paraqitur nga prokuroria, e cila po e heton Endri Pukën për shpërdorim detyre me pasoja të rënda financiare.
Ndonëse gjykatësi ka firmosur vendimin për pezullimin e Pukës më datën 2, autoritetet shtetërore kanë injoruar verdiktin e gjykatës dhe Puka ka shkuar në zyrë rregullisht.
Endri Puka po hetohet nga organi i akuzës në lidhje me shkeljen e disa kontratave koncensionare në mënyrë arbitrare, duke sjellë barrë për financat shtetërore por dhe me pasojë ndotjen e mjedisit.
Endri Puka konsiderohet si drejtori i ‘hambarit të jugut’, drejtues i një prej kompanive më të mëdha publike të vendit, Albpetrol.
Puka u vendos në këtë post në vitin 2013 si një sugjerim i deputetit Koço Kokëdhima, por prej afro një viti ai ka besimin direkt të kryeministrit Rama dhe ministrit Gjiknuri dhe punon ngushtësisht vetëm me ta.
Puka dyshohet për një sërë shkeljesh të rënda të kryera javët e fundit gjatë ushtrimit të detyrës.
Endri Puka është i angazhuar dhe në fushatën elektorale të PS-së e në mënyrë informale, atij i është besuar zona delikate e Delvinës.
Reagimi i Albpetrol
Albpetrol ka reaguar pas vendimit për pezullimin e administratotit të saj, Endri Puka. Përmes një komunikate për mediat, kjo shoqëri thotë se e ka ankimuar në Gjykatën Administrative vendimin për pezullimin e Pukës. Vendimi është marrë në datën 2 qershor 2017 dhe firmosur nga gjyqtari Albert Spiro, pas një kërkese të paraqitur nga prokuroria, e cila po e heton Endri Pukën për shpërdorim detyre me pasoja të rënda financiare.
Endri Puka po hetohet nga organi i akuzës në lidhje me shkeljen e disa kontratave koncensionare në mënyrë arbitrare, duke sjellë barrë për financat shtetërore por dhe me pasojë ndotjen e mjedisit. Më poshtë reagimi i plotë i Albpetrol.
Shoqëria Albpetrol sh.a që nga fillimi i këtij viti ka prishur 6 Marrëveshje Hidrokarbure me kompani të ndryshme që operonin në fushën e kërkimit dhe shfrytëzimit të hidrokarbureve në vendin tonë. Arsyet kryesore të prishjes së kontratave janë mos pagesa e detyrimeve, mos kryerja e investimeve, kushtet skandaloze mjedisore dhe të sigurisë teknike, mos pagesa e rrogave të punonjësve etj. Përveç dëmit që i kanë shkaktuar Albpetrol, këto shoqëri, i kanë shkaktuar edhe miliona dollarë dëme buxhetit të shtetit nëpërmjet kontrabandës, falsifikimeve, mospagimit të taksave etj. Është hera e parë që Albpetrol me mbështetjen e MEI po vepron me vendosmëri për të prishur çdo kontratë që nuk respektohet.
Prishja e koncesionit të fundit, atij të Amonicës, ka bërë që kontraktori Phoenix Petroleum dhe aksionerët e tij, Isuf Berberi dhe Neim Kasaj, të bëjnë disa kallëzime penale në prokurori, ankime të shumta në institucione të ndryshme, si dhe u angazhuan në një fushatë personale shpifjesh në portale e media te ndryshme. Kallëzimet penale kanë të njëjtën fabul, pretendimin e kompanisë koncesionare për prishjen e padrejte të Marrëveshjes Hidrokarbure.
