Babai i vogëlushes 16-vjeçare Blerta Pepës, rrëfen momentin tronditës kur morri vesh për lajmin tragjik të humbjes së vajzës së saj pas një operacioni në gju tek Spitali privat Continental.
“Dhimbja është shumë e madhe, më iku një jetë, më iku jeta ime, vajza ime për arsye të mjekësisë që kemi sot. Në këtë situatë, vajzës i ndodhi një pakujdesi shumë e rëndë nga spitali “Continental”, që ka marrë një emër të madh dhe në këtë gjë që ka bërë ky spital më mori jetën e vajzës. Për një arsye të kotë, për një ligament, m’u vra vajza, një menisk i dëmtuar dhe më iku jeta e vajzës. Pakujdesia e mjekëve, e anestezistëve, shkaku që morëm vesh është se i kanë futur dozë të tepërt të fortë. Dhe vajzën unë e kam dërguar me duart e mia tek ata, u kam thënë që vajza është alergjike, që ia bëjnë dot ndërhyrjen apo jo dhe ata më thanë që mund të bëhet operim”.
“Mjeku kirurg ishte i huaj, foli me kunatin se fliste anglisht, çdo gjë shkoi “Ok”, operacioni shkoi në rregull dhe menisku nuk është aq i ndërlikuar sa e tregon rezonanca. Ai iku pastaj dhe pastaj shohim lëvizje të mjekëve që vraponin dhe doli një infermiere dhe e pyeta nëse kishte gjë vajza ime. Jo more, – tha, – është një tjetër, jo vajza jote. Aty shkova te dera e sallës së operacionit, e shqeva derën dhe pashë vajzën që po i bënin pompim në gjoks. Aty më ka rënë të fikët, për momentin nuk jam përmendur fare, më morën mjekët. Si përfundim në orën 1:00 të natës dolën mjekët dhe kërkuan kunatin dhe i dhanë lajmin e fundit për vajzën time”,- ka vijuar Pepa.
“Shteti të vërë duart në këto klinika që janë hapur dhe të merren masa për atë njeri që më mori jetën e vajzës. Vajza ime ka qenë artiste, aktivizohej në aktivitete të shkollës, por nuk e di se si ndodhi kjo, jam shumë i indinjuar”. ka thënë mes lotësh Bardhyl Pepa.
