Ndërsa Rama-Meta kanë caktuar ditën e enjte për seancën e tretë të zgjedhjes së Presidentit të ri të vendit, opozita artikulon sërish kërkesën që kreu i ri i shtetit të zgjidhet nga populli. Sot ishte hera e dytë që Lulzim Basha foli publikisht për një president të ri nga populli. Kjo shkon me shpalljen e tij për një “republikë të re”. Nga çadra e protestës ai denoncoi sot heshtjen prej 24 orësh të Edi Ramës dhe Ilir Metës për propozimin e opozitës. Megjithatë ky propozim i tij vjen në një moment kur janë konsumuar dy raunde për zgjedhjen e kreut të shtetit dhe kur ka nisur praktikisht gara. Kjo e bën të duket propozimin e Bashës më shumë propagandë sesa një ofertë serioze që Presidenti i ri i Shqipërisë të votohet nga populli.
“24 orë pas këtij propozimi dhe Rama dhe Meta kanë heshtur. Pse?Sepse është futur populli në mes. Populli e prish pazarin e republikës së vjetër. Ja ku del qartë komploti politik në kurriz të popullit. Në pazaret e tyre gjithçka për pasurinë dhe pushtetin, por asgjë për qytetarët. Ne nuk pranojmë Pazar me postin e Presidentit të ri. Në konceptin e “republikës së re”, presidenti i takon popullit dhe do të zgjidhet nga populli. Në vend që të çoheshin të dy për një president nga populli kanë zgjedhur të heshtin”, u shpreh Basha.
Propozimin e kreut të opozitës e ka mbështetur deri më tani kreu i LIBRA-s, Ben Blushi, i cili faktikisht ishte i pari që e artikuloi publikisht një vit më parë një propozim të tillë, madje inicoi edhe mbledhjen e firmave. Pas tij ishte edhe PDIU që e mbështeti idenë e zgjedhjes së Presidentit nga populli. Ndërkohë që kreu i PD-së nuk e mbështeti publikisht një propozim të tillë. Dje Blushi i kërkoi Bashës të dorëzonte firmat për ta mbështetur këtë iniciativë. Më herët gjatë javës Blushi denoncoi prapaskenat e nxitimit të Ramës dhe Metës për të ezauruar raundet e zgjedhjes së Presidentit të ri.
Sipas tij skenari është që të dështohet me zgjedhjen e kreut të shtetit dhe vendi të shkojë në zgjedhje të parakohshme brenda 45 ditësh, ndërsa në këmbim të kësaj Rama përfiton koalicionin me LSI-në, ndërsa LSI postin e Presidentit të Republikës.
Deri më tani kryeministri Edi Rama dhe kreu i Kuvendit Ilir Meta nuk kanë folur për propozimin e Bashës për zgjedhje e Presidentit nga populli dhe vetting pas qeverisë teknike dhe sipas konsensustit të 21 korrikut të vitit 2016.
Aktualisht zgjedhja e Presidentit bëhet nga Parlamenti me 5 raunde. Nëse do të shkohet drejt zgjedhjes nga populli palët duhet të ulen për të ndryshuar sërish Kushtetutën, nismë që ka shumë pak gjasa të ndodhë.
