Në janar të vitit 2005 në komisariatin 4 të Tiranës ndodhi një ngjarje e rëndë. Një i ndaluar humbi jetën në rrethana të paqarta. Viktima ishte Agim Daka me origjinë nga Tropoja. Vëllai i tij Bujar Daka nga Cërrnica e Tropojës ishte arratisur së bashku me 2 persona të tjerë nga ambientet e paraburgimit në Shkodër dhe për këtë policia kishte ndaluar vëllain e tij për ta marrë në pyetje. Zyrtarisht thuhet se ai kreuj vetëvrasje, por në atë kohë deputetë të opozitës akuzuan shefin e komisariatit Artan Cuku se kishte torturuar Dakën derisa ai kishte humbur jetën.
Ish-deputeti i Tropojës Azgan Haklaj mbajti këtë deklaratë në parlament: “Agim Daka ishte qytetar i thjeshtë e i pambrojtur, ai ra viktimë e klanit farefisnor të prokurorit të Shkodres Ulsi Manja, të drejtorit të Shkodrës Ahmet Premci, të drejtorit të Shërbimit të Kontrollit të Brendshëm (SHKB) Sami Rasha, të ministrit Toska, të prokurorit Visha e Sollaku, etj., të cilët duke qenë miq të ngushtë e me lidhje gjinie shumë të afërt me njëri-tjetrin, urdhëruan Rambon e tyre Artan Cuku të vidhte Agim Dakën në mes të rruges e ta masakronte për dhjetra orë në polici, duke mos i lejuar atij të ketë as një avokat siç e parashikon ligji, ose të paktën të njoftohej familja e tij, por më në fund e vranë edhe Agim Dakën” – ka thënë Haklaj në atë kohë.
Edhe drejtori i policisë së Tiranës Ervin Hodaj që ka dhënë detaje mbi ekzekutimin e ish-drejtorit të policisë së Vlorës Artan Cuku dhe se hakmarrja është një nga pistat e vrasjes. Megjithatë ende asgjë nuk është zyrtare.
