Një oficer i policisë gjyqësore tek Krimet e Rënda dëshmoi këtë të hënë në Gjykatën e Lartë në procesin kundër gjyqtares Majlinda Andrea.
Gjatë seancës oficeri, Petrit Gjecaj u pyet nga gjyqtarët si dhe nga pala mbrojtëse se ku e kishte gjetur informacionin për aferën e korrupsionit që zbuloi më pas 5 të dyshuar, mes tyre edhe gjyqtaren Andrea me bashkëshortin.
“Nuk e tregoj burimin. Informacioni për këtë aferë rezultoi i vërtetë”, tha dëshmitari.
Ai i tha gjykatësve se kishte informacion fillestar për këtë aferë, ku përfliten si të përfshirë 3 gjyqtarë, 1 zyrtar i lartë dhe 3 avokatë, por hetimet dhe përgjimet e mëpasshme nuk mblodhën prova që do t’i inkriminonin ata.
Të dhënat implikuan vetëm gjyqtaren e Lartë, Majlinda Andrea, e cila akuzohet se ka kryer korrupsion, ndërsa dyshohet se është paguar përmes bashkëshortit nga të dyshuarit e tjerë, për dhënien e një vendimi civil në Butrint.
Trupa gjykuese refuzoi kërkesën e avokatëve, të cilët insistuan që dëshmitari të detyrohej me urdhër gjykate për të treguar informatorin e tij.
