Më në 8 Prill të vitit 2015 vetëm 1 javë pas shpërthimeve tronditëse në fushën naftëmbajtëse të Marinzës, ku si pasojë u dëmtua jo vetëm mjedisi por edhe ekonomia e banorëve të zonës, kryeministri Edi Rama akuzoi kompaninë që kryen kërkime në zonë, “Bankers Petrolium” dhe u premtoi të dëmtuarëve se do t’i jepte fund abuzimeve me ta dhe nëntokën shqiptare.
“E dimë mirë se çfarë fuqie kanë ato që prej kaq vitesh ku kanë gjetur shesh kanë bërë përshesh, duke na lënë një përshesh nafte, duke vënë mina kudo ku vunë dorën si ajo në Marinzë. Por jo vetëm që nuk na dridhet qerpiku, por do t’u rrimë përballë dhe do t’i qëndrojmë në kornizën e ligjit. Në vendin tonë do të sigurojmë që çdo lloj ndërkombëtari nëse bën biznes në Shqipëri të mos trajtojë asnjë shqiptar si qenie e dorës së dytë. Nuk diskutohet as se kompania duhet të na bërë në dispozicion planin afatmesëm të rehabilitimit por do të kërkojmë një audit ndërkombëtar si në çdo vend demokrat, duke mbrojtur interesat e kombit, dhe siç ndodh sa herë që kompanitë e naftës bëjnë çuditë e tyre. dhe bazuar në auditin ndërkombëtar ne do të marrim edhe rezultatin e të gjitha problematikave që ka shtetit shqiptar, dhe për çdo problematikë kompania do të vihet përpara përgjegjësisë si në SHBA, Gjermani apo Kanada”, deklaronte Rama.
Por sot kompania së bashku me qeverinë “Rama” duket se kanë një marrëveshje në kurriz të banorëve. Sot qeveria hesht, edhe pse më shumë se prej një muaji banorët e Zharrëzës u ngujuan në grevë urie. Ata sot kanë mbëritur në kryeqytet pas 4 ditëve marshimi në këmbë dhe po protestojnë kundër harresës së qeverisë ndaj hallit jetik të tyre. Banorët thonë se kompania u ka shkatërruar shtëpitë e tyre.
