Komisioni qëndror i zgjedhjeve ka pasur në historinë e tij, kryetarë që do të mbahen mend si njolla turpi: Celibashi i viteve 2000-2001 Arben Ristani i vitit 2011. Por me sa duket në këtë rrugë po hyn edhe kryetari i ri i KQZ-së ende pa filluar gara elektorale. Komisioni që ai drejton ka marrë një vendim për t’i vështirësuar rrugën drejt hyrjes në zgjedhje partisë më të re LIBRA-s së Ben Blushit. Sipas Kodit Zgjedhor një parti e cila ka një mandat deputeti, gjashtë muaj përpara ditës së zgjedhjeve, mund të rregjistrohet në zgjedhje. LIBRA ka dy mandate deputetësh dhe e përmbush këtë kusht. Por KQZ ka propozuar një udhëzim sipas të cilit data referencë e rregjistrimit nuk është dita e zgjedhjeve por dita e dorëzimit të listave të deputetëve. Pra jo 18 qershori por 28 prilli.
“Ky akt është totalisht i personalizuar dhe bëhet vetëm për të penalizuar LIBRA. Kjo është njëlloj sikur 1 qershorin ta bësh 1 prill me vendim KQZ-je. Natyrisht nuk është mendja e BIBAVE të KQZ por e bandës së Rilindjes” ka deklaruar Ben Blushi menjëherë pasi është njohur më këtë vendim.
Por me këtë akt, më tepër se fati i partisë së re të Blushit është në pikpyetje fati i vetë zgjedhjeve.
A do të sillet Denar Biba si pararadhësit e tij më të damkosur? A do të veprojë ai si një militant i bindur partie? A do të jetë ai vegël e “bandës së rilindjes”, siç e quan Blushi?
Ky veprim ka bërë të reagojë menjëherë edhe Partinë Demokratike. “Përpjekja për të penguar pjesëmarrjen e disa subjekteve politike në zgjedhje duke përfshirë partinë e Blushit është akti i fundit i Ramës kundër zgjedhjeve të lira.
Ai ka futur në punë çdo mjet e levë që ka në dorë për të vjedhur zgjedhjet. Liron një bandë, shpik diagnozë për të nxjerrë një kriminel nga burgu, numëron tonelatat e drogës dhe lekët e pista me të cilat do të blejë zgjedhjet. Të gjithë këto për të ndalur vullnetin e lirë të njerëzve. Prandaj ka 1 vit që kundërshton votimin dhe numërimin elektronik”ka deklaruar Basha. Edhe shefi i opozitës ka gjetur një rast për të goditur Bibën i cili menjëherë sapo u nhodh ideja e votimit elektronik qe i pari që dha përgjigjen: “Nuk ka kohë”.
A vlejnë këtë fakte për të reshtuar Bibën mes militantëve që nuk e përfillin ligjin? Ndoshta është ende shpejt të thuhet. Por shenjat e para janë shqetësuese. (Lapsi.al)
