Kreu i Libra-s, deputeti Ben Blushi ka reaguar në lidhje me një vendim të Komisionit Qëndror të Zgjedhjeve që nuk lejon regjistrimin e partisë së tij për zgjedhjet e 18 qershorit.
E sipas Blushit ky vendim absurd i KQZ-së që merr si referencë datën 28 prill e jo 18 qershor, është sikur 1 qershorin ta festojmë në 1 prill!? Ai e quan bandë Rilindjen, që do të nxjerrë Libra-n jashtë ligjit
“Pabesisht KQZ ka propozuar një akt që kërkon të bllokojë pjesëmarrjen e LIBRA-s në zgjedhjet e ardhshme të 18 qershorit. Sipas Kodit Zgjedhor një parti e cila ka një mandat deputeti, gjashtë muaj përpara ditës së zgjedhjeve, mund të regjistrohet në zgjedhje. LIBRA ka dy mandate deputetësh dhe e përmbush këtë kusht. Por KQZ ka propozuar një udhëzim sipas të cilit data referencë e regjistrimit nuk është dita e zgjedhjeve por dita e dorëzimit të listave të deputetëve. Pra jo 18 qershori, por 28 prilli.
Ky akt është totalisht i personalizuar dhe bëhet vetëm për të penalizuar LIBRA. Kjo është njëlloj sikur 1 qershorin ta bësh 1 prill me vendim KQZ-je.
Natyrisht nuk është mendja e BIBAVE të KQZ por e bandës së Rilindjes. E kanë kot. LIBRA do shkojë në zgjedhje me çdo kusht dhe me çdo çmim pavarësisht nga Bibat, Bubat, Babat dhe Bebat e Rilindjes!”, shkruan Blushi.
