Banka Europiane për Rindërtim dhe Zhvillim, BERZH deklaron se pabarazia në Shqipëri është rritur gjatë 4 viteve të fundit. Duke prezantuar në Tiranë “Raportin e Tranzicionit 2016-2017”, BERZH bëri me dije se numri i qytetarëve shqiptarë që perceptojnë rritje të pabarazisë është 30 për qind më i lartë se sa numri i atyre që perceptojnë rënie.
“Njerëzit mendojnë se pabarazia është rritur edhe pse statistikat zyrtare tregojnë se ajo është ulur”, tha Francesca Dalla Pozza, ekonomiste e BERZH.
Ajo theksoi se perceptimi i qytetarëve mbi pabarazinë është më i rëndësishëm se sa ajo që tregojnë shifrat zyrtare.
“Një literaturë e gjerë tregon se perceptimet e njerëzve janë më të rëndësishme se sa ajo që tregojnë statistikat zyrtare në formimin e besimit të individëve dhe mënyrën se si ata votojnë”, tha Pozza.
Qeveria aktuale, në vitin 2014 ndryshoi sistemin tatimor të të ardhurave duke vendosur taksën progresive. Qeveria “Rama” pretendon ky sistem është më i ndershëm dhe mbron shtresat me të ardhura të ulëta dhe të mesme duke ulur taksat për 97 për qind të popullsisë.
