Ish-kryetarja e AMA-s, Endira Bushati ka denoncuar dhënien e licencës së tretë kombëtare nga pasardhësi i saj në detyrë, Gentian Sala manjates së mediave Vjollca Hoxhës. Sipas Bushatit kjo është një vjedhje e organizuar nga shteti.
“Sot, AMA, me dhunë, me 4 vota, kur ligji kërkon shumicë të cilësuar prej 5 votash, i dha licencën e tretë Vjollca Hoxhës dhe familjarëve të saj. Sot, AMA licencoi si operator kombëtar shoqërinë ADTN, të krijuar më 13 shtator 2016, dhe që ka aksioner të vetëm 100% shoqërinë Digitalb”, shkruan Bushati në Facebook.
Bushati thotë se edhe “prokuroria tërësisht e kapur dhe nën makthin e Vettingut, nuk vepron”.
Ja reagimi i plotë i Bushatit në Facebook:
Po kur… Organizata Kriminale më e fuqishme në vend … është vetë Shteti, çfarë bëhet??????
Sot, AMA, me dhunë, me 4 vota, kur ligji kërkon shumicë të cilësuar prej 5 votash, i dha licencën e tretë Vjollca Hoxhës dhe familjarëve të saj!
Sot, AMA licencoi si operator kombëtar shoqërinë ADTN, të krijuar më 13 shtator 2016, dhe që ka aksioner të vetëm 100% shoqërinë Digitalb!
Kështu, nga 5 licenca kombëtare:
Një licencë e mori Top Channel,
Të dytën në kundërshtim me ligjin e mori Digitalb,
Dhe të tretën e mori ADTN që është në pronësi të Digitalb.
Sandri “lëvizi” Gjykatën Kushtetuese, që bashkë me bashkëshorten të kishin 80% të aksioneve për licencën e vet….
Të 4 licencat nuk morën asnjëra 5 votat e kërkuara nga ligji. Dhe, kur TCH, Klan dhe DGA e fituan në shkallë të parë, AMA dhe Avokatura e Shtetit, në shpërdorim të detyrës, “çuditërisht” nuk e ankimuan në Apel!!!
Sot, AMA me dhunë i dha licencën e katërt ADTN-së! Prokuroria hesht!
Rama bën sikur nuk kupton, ndërkohë që nën dhe, kërcënoi e shantazhoi këdo që kundërshtonte. Vlahutin, Lu, OSBE dhe KiE heshtin!
Ashtu siç heshtën, kur një shtet i tërë, me parlament e prokurori donin të hiqnin me çdo mjet e me çdo kusht Endira Bushatin nga kreu i AMAs…
Ashtu siç heshtën, kur unë personalisht u kërcënova me jetën time e të familjarëve nga Alban Jaho, Drejtor i Digitalbit! Thuajse të gjithë televizionet heshtën, prokuroria mbylli çështjen!
Ashtu siç folën me gjysmë zëri, kur Balla, “papritmas” propozoi shfuqizimin e nenit 62 të ligjit, që pengonte një person dhe familjarët e tij të kishin më shumë se 40% të aksioneve në një licencë kombëtare!
Prokuroria tërësisht e kapur dhe nën makthin e Vettingut, nuk vepron!!!
Dëshmitarët janë aty: Sami Neza, Suela Musta dhe Agron Gjekmarkaj, me integritet e qytetari të lartë qëndruan para presioneve e shantazheve….
Por, kjo prapë nuk mjaftoi para dhunës së kamikazit të Digitalbit Gentian Sala!
Si mund të mundet një organizatë kriminale, kur në krye të organizatës është vetë SHTETI??????
P.S: Vazhdoni blini Digitalb, është vjedhje që organizohet nga Shteti!
