Ish-drejtori i “Tirana Bank”, Altin Jaku, sot sekretar i përgjithshëm i Prefekturës së Lezhës, emëruar nga Partia Socialiste u denoncua mbrëmë si personi në qendër të skandalit të vjedhjes së depozitave të klientëve. Rasti u denoncua në emisionin investigativ “Stop”. Mësohet se për disa muaj Jaku ka mbajtur edhe detyrën e Prefektit, si i komanduar.
Jaku është nën hetim nga prokuroria pasi është denoncuar nga një qytetar se në vitin 2013 ka vjedhur kursimet në shumën e 150 milionë lekëve (të vjetra) në llogarinë bankare në ‘Tirana Bank’. Përmes falsifikimit të firmave ai ka bërë kalimin e parave në disa numra llogarish, ku njëra prej tyre është e të fejuarës së tij, Inida Kruja.
Edhe pse ka 4 vite që Altin Baruti ka denoncuar vjedhjen e parave në bankë ai nuk ka gjetur zgjidhje. Prokuroria e Lezhës ka zvarritur hetimet për këtë ngjarje, ndaj personi i prekur nga kjo vjedhje galopante në bankë iu drejtua emisionit “Stop”.
Duke përdorur kamerat e fshehta, shihet se ish-drejtori i bankës tani zyrtar në shtet, Altin Jaku e pranon fajin, por kërkon që të mos dënohet, por të lidhë akt-marrëveshje me denoncuesin, pra ti njohë borxhin.
