Odhise Andrea, bashkëshorti i ish-gjyqtares Majlinda Andrea, i akuzuar për korrupsion, u paraqit sot në Gjykatë të Lartë ku u mbajt masa e sigurisë për të. Andrea tha në gjyq se organi i akuzës sipas tij “ka bërë selektim të provave, ka mbajtur telefonatat që i duheshin dhe nuk i ka nxjerrë të gjitha telefonatat apo vëzhgimet”.
Duke mohuar akuzës Andrea ka pranuar të ketë marrë lekë nga Petraq Dashi. Por sipas tij “50 mije eurot se i duheshin për një biznes” që ka dhe se do të bënte një pagesë për të blerë një makineri.
Lidhur me udhëtimin në Itali, burri i ish-gjyqtares tha se ai ka qenë i planifikuar 10 ditëpara se të publikohej skandali.
Sipas Odhise Andreas ai e dinte se ishte shpallur në kërkim, por tani gjeti mënyrën dhe “erdha para jush”.
Por ai nuk dha shpjegime para togave të zeza për formën se si hyri dhe si doli nga Shqiperia.
Avokati i Andreas kërkoi zëvendësim e masës së sigurisë nga “arrest me burg” në “arrest shtëpie”, por gjykata u tërhoq për vendim.
Andrea u vetëdorëzua në Policinë e Tiranës pak ditë më parë.
Odhise Andrea ishte shpallur në kërkim ndërkombëtar pasi dyshohet se kishte marrë, si sekser i bashkëshortesh gjyqtare, 50 mijë euro ryshfet për një çështje pronash. Ai ka punuar edhe si këshilltar pranë Komisionit të Sigurisë në Kuvend.
Bashkëshortja e tij, Majlinda Andrea, është pezulluar nga detyra dhe ka masën ‘detyrim paraqitje” në gjykatë për të njëjtën çështje.
