Gati 5 muaj përpara zgjedhjeve parlamentare, Luçiano Boçi është i bindur se pa reformë zgjedhore nuk mund të ketë votim të lirë më 18 qershor të këtij viti. Në një intervistë për Boldnews.al, deputeti i Partisë Demokratike e cilëson të domosdoshëm shtyerjen e zgjedhjeve parlamentare.
“Në kushte ku reforma zgjedhore është drejtë dështimit kërkesa për shtyerjen e zgjedhjeve është krejtësisht normale. Edhe deklarata e kreut të Partisë Demokratike, Edi Paloka është një mendim përtej atij personal, pasi është evidente fati i zgjedhjeve të ardhshme.” – tha Boçi.
Megjithatë deputeti i Partisë Demokratike shtoi se ky opsion nuk është diskutuar ende me grupin parlamentar të kësaj force politike, në mënyrë që të merret mendimi i të gjithëve.
“Në Shqipëri nuk ka zgjedhje të lira, pasi nuk ka reformë zgjedhore. Përsa i përket deklaratës së Palokës, nuk është e rëndësishme se kush e jep deklaratën, ajo që ka rëndësi është se brenda saj është mendimi i të gjithë demokratëve” –u shpreh deputeti Boçi.
Në pronocimin e tij për Boldnews.al, Luçiano Boçi u ndal edhe tek programi që Partia Demokatike po punon për zgjedhjet e ardhshme.
“Ndërkohë ne kemi filluar me përgatitjet e planit me të cilin do të vijmë në zgjedhjet e ardhshme. Për këtë po punojnë departamentet dhe ekspertët ndërsa në shkurt do të kemi një takim me CDU për hartimin e programit elektoral në zgjedhjet e ardhshme. PD po ndërhyn në të gjitha strukturat ku është e nevojshme, dhe për rigjenerimin e të gjitha degëve të Partisë Demokartike.”-shtoi ai.
Ndër problemet kryesore që hasen në reformën zgjedhore është votimi i emigrantëve dhe depolitizimi i komisionerëve të qendrave të numërimit.
